Cotton Seed : तेलंगण, आंध्रातील कापूस बियाणे यवतमाळ जिल्ह्यात दाखल

Yavatmal News : पेरणी हंगाम सुरू होण्यापूर्वीच जिल्ह्यात तेलंगणा, आंध्र प्रदेश, कर्नाटक या राज्यांतून कापूस बियाणे दाखल होत आहे. शेतकऱ्यांना बियाणे खरेदीकरिता आणण्यासाठी खासगी वाहनचालकांना आर्थिक प्रलोभन दिले जात आहे. शेतकऱ्यांनाही बियाण्यांवर सूट दिली जात असल्याची माहिती आहे.

खरीप हंगाम सुरू होण्यासाठी अजून बराच कालावधी आहे. शेतकऱ्यांनी आतापासून तयारीला सुरुवात केली आहे. खरीप हंगाम सुरू होण्यापूर्वी अप्रमाणित बियाणे विकणारे सक्रिय झाले आहेत.

१५ मे नंतर कपाशीचे बियाणे शेतकऱ्यांना विक्रीचे आदेश कृषी सेवा केंद्र चालकांना देण्यात आले आहेत. त्यामुळे सध्या तरी जिल्ह्यात केवळ बियाण्यांचा साठा केला जात आहे. पावसापूर्वी जास्तीत जास्त शेतकऱ्यांना अप्रामाणित बियाणे विकण्याचा परराज्यांतील काहींचा डाव आहे.

यासाठी खासगी वाहनचालकांना वेगवेगळी आमिषे दाखविली जात आहेत. शेतकऱ्यांना घेऊन जाणाऱ्या खासगी वाहनचालकांना आर्थिक लाभ दिला जात असल्याची चर्चा आहे. शिवाय, शेतकऱ्यांनी खरेदी केलेल्या बियाणे रकमेवरही लाभ दिला जात आहे.

बियाण्यांच्या दरात शेतकऱ्यांनाही सवलत दिली जात असल्याची चर्चा आहे. विशेष म्हणजे, वाहनचालकांना संबंधितांकडूनच वाहनभाडे दिले जात असल्याची माहिती आहे. कमी किमतीत बियाणे मिळत असल्याने शेतकरी अशा आमिषांना बळी पडण्याची शक्यता आहे.