Dr.Swaminathan: डॉ. स्वामिनाथन यांच्या विचारांची कास धरूया

Nashik News: भारतीय कृषी क्षेत्रात आमूलाग्र बदल घडविण्यासाठी डॉ. एम. एस. स्वामिनाथन यांनी महत्त्वपूर्ण योगदान दिले. अन्नटंचाई, देशावर दुष्काळाचे सावट असताना त्यांच्या दूरदृष्टीमुळे देशात कृषी समृद्धीचा नवा अध्याय सुरू झाला. त्यांचा विचार घेऊन शाश्वत शेतीची कास धरूया आणि शेतीक्षेत्राला समृद्ध करूया, असे प्रतिपादन नाशिक विभागीय कृषी सहसंचालक सुभाष काटकर यांनी केले.

हरितक्रांतीचे प्रणेते भारतरत्न डॉ. स्वामिनाथन यांचा जन्मदिवस राज्य शासनाच्या वतीने ‘शाश्‍वत शेती दिन’ म्हणून साजरा करण्यात येत आहे. या निमित्ताने गुरुवारी (ता. ७) दिंडोरी (जि. नाशिक) येथील प्रयोगशील शेतकरी प्रताप बनकर यांच्या शेतावर कृषी विभाग, कृषी तंत्रज्ञान व्यवस्थापन यंत्रणा (आत्मा) यांच्यामार्फत कार्यशाळा आयोजित करण्यात आली.

या प्रसंगी जिल्हा अधीक्षक कृषी अधिकारी रवींद्र माने, आत्मा प्रकल्प संचालक अभिमन्यू काशीद यांची प्रमुख उपस्थिती होती. या कार्यक्रमाअंतर्गत काटकर यांनी डॉ. स्वामिनाथन यांच्या शेती क्षेत्रातील योगदान आणि शाश्वत शेती संकल्पनेबद्दल मार्गदर्शन केले. ते म्हणाले, राष्ट्रीय शेतकरी आयोगाच्या माध्यमातून डॉ. स्वामिनाथन यांनी केलेल्या शिफारशीमुळे मोठे बदल घडले.

त्यांच्या संकल्पनेतील शाश्वत शेती म्हणजे सेंद्रिय किंवा फक्त नैसर्गिक शेती नसून तर शाश्वत शेती होती. ज्या माध्यमातून फक्त शेतकऱ्यांना उत्पादन वाढ नव्हे, तर शाश्वत बाजार व्यवस्था व शाश्वत उत्पन्न होते.श्री. माने यांनी शाश्वत शेती गरज आणि पुढील वाटचाल याबाबत माहिती दिली. श्री. काशीद यांनी राष्ट्रीय नैसर्गिक शेती मिशनबाबत माहिती दिली.

शाश्वत शेती फाउंडेशन आणि सह्याद्री फार्म्सचे संचालक मंगेश भास्कर यांनी शाश्वत शेती, नैसर्गिक शेती, दहा ड्रम थिअरी याबाबत मार्गदर्शन केले. नाशिक कृषी विज्ञान केंद्राचे मंगेश व्यवहारे यांनी जैविक निविष्ठा, बुरशीनाशके, कीटकनाशके बनविण्याच्या पद्धतींबाबत माहिती दिली. तसेच नैसर्गिक शेती करणारे संदीप जाधव, श्याम मोगल यांचा सन्मान करण्यात आला. आत्माचे प्रकल्प उपसंचालक विलास सोनवणे यांनी प्रास्ताविक केले. श्री. भोये यांनी आभार मानले.