Co-Operative Election : पुढील वर्षात सहकारातील ६६ संस्थाच्या निवडणुका

Amaravati News : वर्षभरात सहकारातील १५१ संस्थाच्या निवडणुका डोक्यावर असताना पुढील वर्षात ६६ संस्थांच्या निवडणुकांचीही जबाबदारी जिल्हा उपनिबंधक कार्यालयावर येणार आहे.

जानेवारी ते डिसेंबर २०२५ या दरम्यान ६६ संस्थांची मुदत संपणार आहे. त्यामुळे मुदत संपताच जिल्हा उपनिबंधक कार्यालयाकडून निवडणुका घेण्यात येणार आहेत. जिल्ह्यात या वर्षात क वर्गातील २६, ब वर्गातील ३७ व ड वर्गातील ८८ अशा १५१ सहकारातील संस्थांच्या निवडणुका रखडलेल्या आहेत.

यामध्ये सेवा सहकारी संस्थांसह पतसंस्था, संघटना, पणन, औद्योगिक संस्था, रुग्णालय संस्था आदी विविध सहकारातील संस्थांचा समावेश असून या निवडणुकांना सलग चौथ्यांदा मुदतवाढ देण्यात आली आहे.

आधी लोकसभा, त्यानंतर पावसाळा आणि आता विधानसभा निवडणुकांमुळे या निवडणुकांना ३१ डिसेंबरपर्यंत स्थगिती आहे. परंतु विधानसभा निवडणुका संपल्याने कोणत्याही क्षणी निवडणुकांवरील स्थगिती उठवून त्याची प्रक्रिया सुरू होण्याच्या शक्यतेने रखडलेल्या निवडणुकांच्या तयारीला उपजिल्हानिबंधक कार्यालय लागले आहे.

अशातच पुढील वर्षामध्ये देखील ब वर्गातील ६, क वर्गातील ३४ आणि ड वर्गातील २६ अशा ६६ विविध संस्थांचा कार्यकाळ संपुष्टात येत आहे.

त्यामुळे टप्प्याटप्प्याने या संस्थांच्या निवडणुका घेतल्या जाणार आहेत. यामध्ये सेवा सहकारी, नोकरदार, पतसंस्था, नागरी संस्था, पाणी वापर आदी विविध संस्थांचा समावेश आहे.