Local Self-Government Elections : बेनकेंचा शेरकरांविरुद्ध शड्डू

Pune News : विधानसभा निवडणुकांचे निकाल लागल्यानंतर आता स्थानिक स्वराज संस्था आणि सहकारी संस्थांच्या निवडणुकांचे वेध पक्ष नेते, कार्यकर्त्यांना लागले आहेत. जुन्नर तालुक्यात धक्कादायक पराभवानंतर माजी आमदार अतुल बेनके यांनी स्थानिक स्वराज्य संस्थांसह विघ्नहर सहकारी साखर कारखान्याची निवडणुक पूर्ण ताकदीनीशी लढण्याचा निर्णय जाहीर करत, कारखान्याचे अध्यक्ष आणि त्यांचे प्रतिस्पर्धी राष्ट्रवादी काँग्रेसचे (शरदचंद्र पवार गट) सत्यशिल शेरकर यांच्या विरोधात शड्डू ठोकला आहे.

विधासभेच्या पराभवाची कारणमीमांसा करण्यासाठी आयोजित बैठकीत बेनके यांनी निर्णय जाहीर केला. या वेळी जुन्नर बाजार समितीचे सभापती संजय काळे, तालुकाध्यक्ष पांडुरंग पवार, ज्येष्ठ नेते गणपतराव फुलवडे, बाजार समितीचे संचालक प्रकाश ताजणे, जिल्हा दूध संघाचे संचालक बाळासाहेब खिलारी, फिरोज पठाण,

जुन्नर शहराध्यक्ष पापाशेठ खोत, तानाजी तांबे, विशाल तांबे, रामदास अभंग, मारुती वायाळ, काळू शेळकांदे, गणपत कवडे, अतुल भांबेरे, गोविंद बोरचटे, उज्ज्वला शेवाळे, सुप्रिया लेंडे, अक्षदा मांडे, पुष्पा गोसावी, वैष्णवी चतुर यांसह विविध पदाधिकारी व कार्यकर्ते उपस्थित होते.

तालुक्यामध्ये दिवंगत शिवाजीराव काळे, निवृत्ती शेरकर, वल्लभ बेनके यांनी अनुक्रमे बाजार समिती, विघ्नहर साखर कारखाना आणि आमदार ही सत्तेची पदे तीन घरात अलिखित राजकीय सामंजस्य कराराने घेतली होती.

यामुळे राष्ट्रवादी आणि काँग्रेस एकसंघ होती. मात्र राष्ट्रवादीच्या फुटीनंतर बेनके अजित पवार गटात गेले आणि सत्यशिल शेरकर यांनी आमदार होण्यासाठी शरदचंद्र पवार गटात प्रवेश करत विधानसभा लढवली. यामुळे आता बेनके यांनी कारखाना लढण्याची घोषणा केल्याने, ‘विघ्नहर’वर सत्ता काबीज करत, शेरकरांना शह देणार का, हे लवकरच कळणार आहे.