Loksabha Election 2024 : पुणे, शिरूर, मावळसाठी आज होणार मतदान

Pune News : १८ व्या लोकसभा निवडणुकीच्या चौथ्या टप्प्यात समावेश असलेल्या पुणे, शिरूर व मावळ या लोकसभा मतदार संघांत आज (ता.१३) मतदान होत आहे. या मतदानासाठी संपूर्ण यंत्रणा सज्ज झाली असून, सर्व मतदान केंद्रांवर साहित्य पाठविण्यात आले आहे. आज सकाळी ७ ते सायंकाळी ६ वाजेपर्यंत मतदान होईल.

निवडणुकीसाठी गेल्या एक महिन्यापासून आरोप-प्रत्यारोप, प्रचारसभांनी तापलेले प्रचाराचे वातावरण शनिवारी (ता.११) सायंकाळी पावसाच्या हजेरीत थंड झाले. मुख्यमंत्री एकनाथ शिंदे, ज्येष्ठ नेते शरद पवार, केंद्रीय मंत्री नितीन गडकरी, उपमुख्यमंत्री देवेंद्र फडणवीस व अजित पवार, रमेश चेन्नीथला, अभिषेक मनु सिंघवी अशा दोन डझनांहून अधिक ‘पॉवरफुल’ नेत्यांच्या प्रचारसभांनी तोफा थंडावल्या. जाहीर सभा, रोड शो, मेळावे, त्यात नेत्यांकडून झालेल्या आरोप-प्रत्यारोपांनी प्रचाराची सांगता झाली.

खासदार सुप्रिया सुळे, प्रदेशाध्यक्ष जयंत पाटील, भाजपचे प्रदेशाध्यक्ष चंद्रशेखर बावनकुळे, कॉंग्रेसचे महाराष्ट्र प्रभारी रमेश चेन्नीथला, कॉंग्रेसचे राष्ट्रीय प्रवक्ते अभिषेक मनू सिंघवी, खासदार चंद्रकांत हंडोरे, शिवसेनेचे नेते उदय सामंत, भाजपचे नेते आमदार प्रवीण दरेकर, कॉंग्रेसचे नेते आमदार विश्‍वजित कदम, आमदार सुनील केदार, यशोमती ठाकूर, प्रा. नितीन बानगुडे पाटील, रोहित पवार, आदिती तटकरे, धैर्यशील मोहिते पाटील यांच्यासह महायुती, महाविकास आघाडी, वंचित बहुजन आघाडी, एमआयएम अशा विविध पक्षांच्या नेत्यांनी शनिवारी प्रचाराच्या सांगता सभा, रॅलीमध्ये भाग घेतला.

...अशा झाल्या सभा

मुख्यमंत्री एकनाथ शिंदे यांनी मावळमधील महायुतीचे उमेदवार श्रीरंग बारणे यांच्यासाठी रोड शो घेतला.

शिरूरचे उमेदवार डॉ. अमोल कोल्हे यांच्यासाठी शरद पवार यांची हडपसरमध्ये सभा

महायुतीचे उमेदवार शिवाजीराव आढळराव पाटील यांच्यासाठी अजित पवार, आदिती तटकरे यांची सभा

पुण्यात महायुतीचे उमेदवार मुरलीधर मोहोळ यांच्यासाठी नितीन गडकरी, देवेंद्र फडणवीस, चंद्रशेखर बावनकुळे यांच्या सभा.

महाविकास आघाडीचे उमेदवार रवींद्र धंगेकर यांच्यासाठी रमेश चेन्नीथला, अभिषेक मनू सिंघवी, सुनील केदार, यशोमती ठाकूर मैदानात