Nature Tourism : जंगल सफारी, खाडी पर्यटनातून आर्थिक समृद्धी

Economic Growth : वेलदूर येथे राहणारे डांगे कुटुंबीय हे मुळातच मच्छीमार समाजातील. समुद्राशी त्यांचा लहानपणापासूनच संबंध. पारंपरिक व्यवसायापलीकडे जाऊन काही करण्याची इच्छा सौ. डांगे यांची होती. त्यासाठी तीन वर्षांपूर्वी डांगे पती-पत्नीने फेरीबोट संकल्पना राबविण्याचा निर्णय घेतला.

पहिल्या दोन वर्षांत त्यांना तेवढा प्रतिसाद लाभला नाही; मात्र गतवर्षी समुद्र सफरीसाठी २०२२ मध्ये दहा लाख रुपये खर्च करून नवीन फायबर बोट विकत घेतली. याकरिता पंतप्रधान रोजगार निर्मिती योजनेअंतर्गत जिल्हा उद्योग केंद्रातून कर्ज घेतले. ग्रामसंघातून १ लाख ३० हजार रुपयांमधून उपजीविका निधी घेतला.

नवीन सुसज्ज नौकेतून सी-व्ह्यू सागरी पर्यटन व्यवसाय सुरू केला आहे. एक तासाच्या सफरीमध्ये गोपाळगड किल्ला, लाइटहाउस, भारती शिपयार्ड, दाभोळ बंदर अशी विविध ठिकाणे पर्यटकांना त्यांच्या सफारीतून पाहायला मिळतात. सायंकाळी समुद्रात मावळत्या सूर्याचा आनंद घेता येतो.

याकरिता प्रतिव्यक्ती ३०० रुपये ते आकारतात. दाभोळ ते वेलदूर अशी ही सफर घडवली जाते. दाभोळ खाडीत सकाळच्या सत्रात डॉल्फिन पाहायला मिळतात. वेलदूर येथील खाडी सफरीचे हे मोठे आकर्षण ठरत आहे. सध्या वर्षाला ५००हून अधिक पर्यटक याचा लाभ घेतात. त्यामधून सुमारे दीड लाखाची उलाढाल होते. हा पर्यटन व्यवसाय सुरू करताना महाराष्ट्र मेरिटाइम बोर्डासह अन्य आवश्यक परवानग्या त्यांनी घेतल्या आहेत. जळगाव येथे झालेल्या लखपती दीदी कार्यक्रमात पंतप्रधान नरेंद्र मोदी यांनी सौ. डांगे यांच्याशी संवाद साधला होता.

तिसरी हाउसबोट दाखल

पर्यटकांचा चांगला प्रतिसाद मिळत असल्यामुळे डांगे यांनी नुकतीच तिसरी हाउसबोट विकत घेतली. या बोटीमध्ये दोन कुटुंबांकरिताची निवास व्यवस्था आहे. एक रात्र खाडीतच राहण्याचा आनंद पर्यटकांना घेता येतो. दाभोळ खाडीतील बॅकवॉटरमध्ये ती उभी करून रात्रभर तिथेच ठेवण्यात येते.