Sugarcane Farming : पाण्याअभावी ऊस लागवडी खोळंबल्या ; ऑक्टोबरअखेर फक्त २८ टक्के लागण

Pune News : यंदा पुरेशा पावसाअभावी आडसाली व पूर्व हंगामी ऊस लागवडी खोळंबल्याचे चित्र आहे. राज्यात सरासरीच्या दहा लाख ९५ हजार ७५ हेक्टरपैकी तीन लाख आठ हजार ४६० हेक्टर म्हणजेच २८ टक्के क्षेत्रांवर ऊस लागवडी झाल्या आहेत.

त्यातच ऑक्टोबरमधील कडक उन्हामुळे जमिनीत पुरेशी ओल नसल्याने ऊस लागवडीला चांगलाच फटका बसत आहे. त्यामुळे पुढील वर्षी साखर कारखान्यांसमोर उसाचा मोठा प्रश्‍न निर्माण होण्याची चिन्हे आहेत.

पावसाळ्यात पुरेसा पाऊस न पडल्याचा फटका शेतकऱ्यांना बसू लागला आहे. यंदा पावसाअभावी खरीप हंगाम वाया गेल्याची स्थिती असताना पाण्याची उपलब्धता असलेल्या ठिकाणी शेतकऱ्यांनी ऊस लागवडीला प्राधान्य दिले. बहुतांश शेतकरी दरवर्षी आडसाली उसाच्या लागवडी १५ जुलै ते १५ ऑगस्ट या दरम्यान करतात.

पूर्व हंगामी उसाच्या १५ लागवडी ऑक्टोबर ते ३० नोव्हेबर या कालावधीत करतात. आत्तापर्यंत आडसाली उसाच्या लागवडी संपल्या आहेत. पूर्व हंगामी उसाच्या लागवडीचे अखेरचे दहा ते बारा दिवस उरले आहेत.

गेल्या वर्षी याच काळात ३ लाख ७७ हजार ३१९ हेक्टर म्हणजेच ३४ टक्के लागवड झाली होती. त्या तुलनेत यंदा तब्बल ६८ हजार ८५९ हेक्टरने लागवड घटली आहे. त्यातच आता अनेक ठिकाणी पाणी टंचाई भेडसावू लागल्याने ऊस लागवडी होण्याची शक्यता कमी झाली आहे. त्यामुळे लागवड फारशी वाढणार नसल्याचे चित्र आहे.

दरवर्षी शेतकरी आडसाली, पूर्वहंगामी, सुरू अशा तीन हंगामांत उसाच्या लागवडी करतात. आडसाली उसाच्या लागवडी केल्यानंतर साधारणपणे पंधरा ते सतरा महिन्यांनी ऊस कारखान्याला तोडणीस देतात.

यंदा ऊस आगार असलेल्या पुणे, नगर, सोलापूर, सातारा, सांगली, कोल्हापूर जिल्ह्यांत ऊस लागवडी घटल्याचे चित्र आहे. मराठवाडा व विदर्भातही फारशा लागवडी झालेल्या नाहीत. त्यामुळे या भागात ऊस लागवडीची स्थिती बिकट होत चालली आहे.

विभागनिहाय उसाचे सरासरी क्षेत्र व लागवड (हेक्टर)

विभाग---सरासरी क्षेत्र---प्रत्यक्ष लागवड---टक्के

छत्रपती संभाजीनगर---९६,९१९---३४,०७२---३५

कोल्हापूर---४,२०,५८९---६३,३५३---१५

नाशिक---४८,३९६---३१,१४४---६४

पुणे---३,४३,३९२---१,२५,७७०---३७

लातूर---१,६८,८९०---४३,३५८---२६

अमरावती---८,१७१---८,१५६---१००

नागपूर---७,२५८---२,५५४---३५

कोकण--१६११---५२---३