Agriculture Research : कृषी शास्त्रज्ञांच्या संशोधनामुळे देशातील १४२ कोटी लोकसंख्येला पुरेसे अन्नधान्य

Akola News : कधीकाळी अन्नधान्यासाठी इतर राष्ट्रांवर अवलंबून असलेल्या आपल्या देशात भारतरत्न ज्येष्ठ कृषिशास्त्रज्ञ डॉ. एम. एस. स्वामिनाथन यांनी गहू आणि धान पिकांच्या उत्पादकता वाढीसाठी केलेल्या संशोधनामुळे स्वयंपूर्णता आली.

आज कृषी शास्त्रज्ञांच्या निरंतर संशोधनामुळे १४२ कोटी लोकसंख्येला पुरेसे सकस अन्नधान्य उपलब्ध करीत निर्यात धोरण राबविण्यापर्यंत शेती क्षेत्राने मजल मारली आहे, असे प्रतिपादन डॉ. पंजाबराव देशमुख कृषी विद्यापीठाचे कुलगुरू डॉ. शरद गडाख यांनी केले.

हरितक्रांतीचे प्रणेते भारतरत्न प्रा. स्वामिनाथन यांच्या जन्मशताब्दी जयंतीदिनी शाश्वत शेती दिनाचा कार्यक्रम आयोजित करण्यात आला होता. या वेळी श्री. गडाख बोलत होते. या वेळी बीबीएफ तंत्रज्ञानाचे प्रसारक शेतकरी दिलीप फुके, प्रयोगशील शेतकरी गणेश नानोटे, विद्यापीठाचे विस्तार शिक्षण संचालक डॉ. धनराज उंदीरवाडे, कृषी अधिष्ठाता डॉ. देवानंद पंचभाई, कृषी अभियांत्रिकी अधिष्ठाता डॉ. सुरेंद्र काळबांडे, जिल्हा अधीक्षक कृषी अधिकारी शंकर किरवे, आत्मा प्रकल्प संचालक डॉ. मुरली इंगळे यांची व्यासपिठावर प्रमुख उपस्थिती होती.

या वेळी श्री. फुके यांनी विद्यापीठाचे तंत्रज्ञान शेतकऱ्यांना उपयुक्त असून त्याचा सर्वांनी फायदा घेण्याचे आवाहन केले. श्री. नानोटे यांनी शेती क्षेत्रातील बदलत्या जागतिक आव्हानांना, संकटांना व संधींना सामोरे जाताना डॉ. पंजाबराव देशमुख कृषी विद्यापीठाद्वारे संशोधित तंत्रज्ञानरूपी ढाल-तलवार समवेत ठेवल्यास आर्थिक फायदेशीर शेती वास्तवात येते. याचे आम्ही लाभार्थी आणि साक्षीदार असल्याचे सांगितले.

प्रास्ताविक डॉ. उंदीरवाडे यांनी केले. याप्रसंगी सेंद्रिय शेतीविषयक शासन पुरस्कृत महिला शेतकरी वंदना देविदास धोत्रे यांचा देखील विशेष सन्मान करण्यात आला. श्री. किरवे आणि डॉ. इंगळे यांनीदेखील मनोगत व्यक्त केले. मुख्य संपादक प्रा. संजीवकुमार सलामे यांनी सूत्रसंचालन केले. आत्मा उपसंचालक प्रेमसिंग मारक यांनी आभार मानले.