Re-Sowing Crisis : सिन्नरला दुबार पेरणीचे संकट

Sinnar News : तालुक्यात पावसाने अनेक ठिकाणी ओढ दिल्याने पावसाळा सुरू होऊन दीड महिन्याचा कालावधी उलटला तरी काही ठिकाणी पावसाने हजेरी लावली असली तरी अद्याप दमदार पाऊस झालेला नसल्याने तालुक्यातील अनेक नद्या, बंधारे, ओढे, नाले कोरडेच आहेत. धरणसाठ्यातून मिळणारे पाणी कमी झाले आहे.

त्यातच दोन-चार दिवसांत दमदार पाऊस न झाल्यास पिके करपून जातील, दुबार पेरणीचे संकट ओढवेल. त्यामुळे सर्व शेतकऱ्यांचे लक्ष दमदार पावसाकडे लागले आहे.तालुक्यात दमदार पाऊस न झाल्यास आगामी काळात पुन्हा पाण्याची कमतरता भासण्याची शक्यता आहे. शेतीबरोबरच जनावरांच्या व पिण्याच्या पाण्याचीही कमतरता भासण्याची शक्यता आहे.

शहरासह तालुक्यातील अनेक गावांना अजूनही या धरणात काहीच पाणीआले नसल्याने अनेकांना टँकरचे विकतचे पाणी घ्यावे लागत आहे. अनेक भागांत पावसाबरोबरच मिळणाऱ्या पाण्यामुळे शेती व जनावरांच्या व पिण्याच्या पाण्याची सोय होत असते. पावसाने ओढ दिल्याने व कधी ढगाळ, तर कधी कडक उन असे नैसर्गिक वातावरण झाल्याने पावसामुळे वाढलेली पाणीपातळी कमी होत गेली.

तालुक्यात काही भागांत पावसाचे प्रमाण कमी आहे. त्यामुळे त्या भागात असलेले बंधारे, मोठे बंधारे, ओढे, नाल्यांमध्ये पाणीसाठा न झाल्याने ओढे व नाल्यांना अद्याप पाणीच आले नाही. त्यामुळे अनेक भागांतील ओढे, नाले, बंधारे कोरडेच असून त्या भागात अद्याप पाण्याची कमतरता आहे. धरण क्षेत्रातही अद्याप समाधानकारक पाऊस न झाल्याने धरणातील पाण्यावर अवंलबून असलेल्या अनेक गावच्या पाणीपुरवठ्याच्या विहिरीदेखील कोरड्या असल्याने गावे ऐन पावसाळ्यात पाणी टंचाईने बेजार आहेत.

पिके वाया जाण्याची भीती

पूर्व भागात अजूनही दमदार पाऊस झाला नसून येथील नदी-नाले कोरडेठाक आहे. मका, बाजरी पीक दोन-चार दिवसांत पाऊस न झाल्यास करपून जाण्याची शक्यता नाकारता येत नाही. हातात आलेले पीक डोळ्यादेखत जात असताना यांसारखी मोठी शोकांतिका नाही. पाऊस न पडल्यास घेतलेले बियाण्यांचे पैसे कसे परत करायचे. मुलांच्या शिक्षणाला पैसे कुठून आणायचे, याचीच चिंता शेतकऱ्यांना आहे.