Turmeric Management : हळद शेतीदिनाच्या कार्यक्रमात पीक व्यवस्थापनावर चर्चा

Washim News : केव्हिकेच्या उद्यानविद्याशाखांतर्गत हळद पिकात उत्पादन वाढीसाठी विविध तंत्रज्ञानाचे प्रात्यक्षिक आयोजित करण्यात आले. रिसोड तालुक्यातील मौजे कोयाळी बुद्रुक येथे गणेश गव्हाणे यांच्या शेतात राबवलेल्या हळद पीक प्रात्यक्षिक क्षेत्रावर शेतीदिन साजरा करण्यात आला.

कार्यक्रमाच्या अध्यक्षस्थानी केव्हीकेचे प्रमुख डॉ. आर. एल. काळे होते. तांत्रिक मार्गदर्शक म्हणून उद्यान विद्यातज्ञ निवृत्ती पाटील, कृषी अर्थतज्ज्ञ डॉ. डी. एन. इंगोले आणि प्रमुख पाहुणे म्हणून वाशीम जिल्ह्यातील प्रगतिशील हळद उत्पादक शेतकरी गजानन ढवळे, रामचंद्र इंगोले, गोविंद देशमुख, योगेश खानझोडे यांची उपस्थिती होती.

सर्वप्रथम प्रात्यक्षिक प्लॉटची तसेच त्याच शेतातील पारंपरिक प्लॉटची पाहणी करून निरीक्षणे घेण्यात आली. गणेश गव्हाणे यांनी केव्हीकेद्वारे राबवलेल्या प्रात्यक्षिक प्लॉटबद्दल माहिती दिली. यामध्ये गट्टू बेण्याचा वापर, कमी कालावधीत येणारी पीडीकेव्ही वायगाव वाण, गोकृपा अमृताचा वापर अशा विविध पद्धतीद्वारे विकसित केलेल्या प्लॉटमध्ये राबविलेल्या संपूर्ण तंत्राबद्दल माहिती दिली.

निवृत्ती पाटील यांनी दोन्ही प्लॉटमधील महत्त्वाच्या तफावतीमध्ये जसे पिकाची वाढ, फुटव्यांची संख्या, आकार आदी विविध फरक दाखवून दिले. तांत्रिक सत्रात योगेश खानझोडे यांच्या शेतात मागील दोन वर्षांपासून राबवितात राबविण्यात येणाऱ्या प्रात्यक्षिकाबद्दल व मिळालेल्या फायद्यांबद्दल संपूर्ण माहिती दिल्या गेली.

गोविंद देशमुख यांनी सुद्धा मागील चार वर्षांपासून राबवित असलेल्या प्रात्यक्षिक व फायद्यांबद्दल सांगितले. प्रयोगशिल शेतकरी गजानन ढवळे यांनी प्रात्यक्षिक व पारंपरिक प्लॉटमधील दिसलेल्या फरकाबाबत माहिती दिली व आलेले परिणाम खरोखर उत्कृष्ट असल्याचे सांगितले.