Farm Road : दिन्नापूर ते तोंडोळी शिवरस्ता केला मोकळा

Chh. Sambhajinagar News : सत्तर वर्षांपासून अर्धा किलोमीटर पेक्षा जास्त बंद असलेला दिन्नापूर ते तोंडोळी शिवरस्ता तहसील कार्यालयाच्या आदेशाने मंडळ अधिकारी, ग्राम महसूल अधिका-यानी मोकळा केल्याने शेतकऱ्यांना शेतीकडे ये-जा करण्यासाठी होणारी गैरसोय दूर झाली आहे.

तीन वर्षांपूर्वी दिन्नापूर येथील शेतकरी कृष्णा बाळकृष्ण खाटीक, भारत मोहनराव खनसे, आदी शेतकऱ्यांनी दिन्नापूर ते तोडोळी शिव रस्त्यावरील अतिक्रमण काढून शिव रस्ता मोकळा करण्याची मागणी पैठण तहसील कार्यालयात केली होती.

त्यावर तहसीलदार पैठण यांनी स्थानिक तलाठी,मंडळ अधिकारी यांच्या स्थळ पाहणी अहवाल व नियमित सुनावणी घेत सदर शिव रस्ता नकाशा नुसार मोकळा करण्यासाठी उपअधिक्षक भूमि अभिलेख यांनी हद्दी व खुणा कायम करून मंडळ अधिका-यानी रस्ता मोकळा करण्याचे आदेश जानेवारी २०२५ ला दिले होते.

त्यानुसार तीन दिवसांपूर्वी लोहगाव मंडळ अधिकारी वैशाली बैनवाड, ढोरकीन मंडळ अधिकारी सीमा भोसले, तोंडोळी तलाठी विमल बांगर, धूपखेडा सजा तलाठी शीतल निकम,बिडकीन पोलिस स्टेशन उप निरिक्षक सेना सहायक फौजदार सोमनाथ तांगडे, हवालदार कदम, पोलिस नाईक श्रीमती राठोड, ग्रामपंचायत पदाधिकारी भीमराव खनसे, संभाजी खनसे, शेतकरी यांच्या उपस्थितीत जवळ पास सहाशे मीटर शिव रस्ता जेसीबी यंत्राच्या मदतीने मोकळा केला. यामुळे शेतकऱ्यांना शेतीकडे जाण्या- येण्यासाठी होणारी गैरसोय दूर झाली आहे.