Soybean Rate : सोयाबीनला प्रतिक्विंटल ६ हजार ९४५ रुपये दर देण्याची मागणी

Nashik News : राज्यात खरीप हंगामातील सोयाबीन हे महत्त्वाचे पीक आहे. सुमारे ५० लाख हेक्टर क्षेत्र या पिकाखाली आहे. त्याची सरासरी उत्पादकता हेक्टरी १४.५६ क्विंटल तर सरासरी उत्पादन खर्च प्रतिक्विंटल ६,०३९ आहे.

त्या अनुषंगाने राज्य कृषी मूल्य आयोगाकडे प्रतीक्विंटल ६९४५ दर दिला जावा, अशी शिफारस केली आहे, ती रास्त आणि योग्य आहे. त्यानुसार चालू हंगामात सोयाबीनला प्रतिक्विंटल ६,९४५ रुपये दर देण्यात यावा, अशी मागणी भारतीय किसान संघाकडून करण्यात आली आहे.

बाजारात यावर्षी सोयाबीन खरेदीदारांनी संघटित प्रयत्नातून दरावर नियंत्रण ठेवून दर प्रतिक्विंटल ४५००च्या वर जाऊ दिले नाहीत. अशा परिस्थितीत जर शेतकऱ्याला उत्पादन खर्चावर लाभकारी किंमत मिळत नसेल तर राज्य सरकारने भावांतर पद्धतीने किंवा बोनसच्या माध्यमातून फरक देण्याची व्यवस्था करावी, या आशयाचे निवेदन मुख्यमंत्री एकनाथ शिंदे यांना किसान संघाकडून पाठविण्यात आले आहे.

तसेच निवेदन नाशिक जिल्हाधिकारी कार्यालयात देण्यात आले. निवेदन देतेवेळी भारतीय किसान संघाचे उत्तर महाराष्ट्र विभाग प्रमुख सुभाष तिडके, नाशिक जिल्हा कोषाध्यक्ष मनोज जगताप, जिल्हा संघटक सूरज कोकणे, जिल्हा उपाध्यक्ष विमल शेरमाळे, सुनीता आव्हाड, बालाजी गायधनी आदी उपस्थित होते.

नैसर्गिक आपत्ती, अतिवृष्टी, कीड-रोग या कारणाने सरासरी उत्पादनावर विपरित परिणाम झाला आहे. अशा परिस्थितीत गणेश चतुर्थी, दसरा, दिवाळी हे सण तोंडावर आहेत.

उत्पादन खर्चावर आधारित लाभकारी किंमत व घामाचे दाम अन्नदात्याला मिळून हे सणासुदीचे दिवस सुखाचे जावेत ही अपेक्षा आहे. लाडक्या बहिणीचा विचार केलात तसा लाडक्या शेतकऱ्यांचा पण निश्चित विचार करून वरील निर्णय घ्यावा, अशी मागणी भारतीय किसान संघाच्या वतीने करण्यात आली आहे.