Soybean Market : अकोल्यात सोयाबीनदर पोहोचला सरासरी ४६०० रुपयांवर

Akola News : मागील दोन-तीन दिवसांपासून सोयाबीनच्या दरामध्ये अचानक थोडी सुधारणा दिसून आली आहे. अकोल्यात शुक्रवारी (ता. ६) सोयाबीनला सरासरी ४६०० रुपयांचा दर मिळाला.

गेल्या महिनाभरातील दरांचा विचार केल्यास हा दर तुलनेने अधिक आहे. किमान दर पहिल्यांदाच चार हजारांवर पोहोचला. मात्र ही तेजी क्षणिक असल्याचे जाणकार सांगतात.

सोयाबीनचा नवीन हंगाम पुढील महिन्यात सर्वत्र होऊ शकतो. या आधीच बाजार समित्यात सोयाबीनच्‍या दरात थोडी सुधारणा दिसत आहे.

शुक्रवारी सोयाबीन किमान ४१०० रुपये तर कमाल ४७४५ रुपये दराने विक्री झाला. सरासरी ४६०० रुपयांचा दर होता. आवकही दोन हजार क्विंटलपेक्षा अधिक म्हणजे २४४१ क्विंटल झाली होती.

गेल्या आठवड्यात या बाजारात सोयाबीनचा किमान दर ३८०० रुपयांपर्यंत मिळत होता. कमाल दरसुद्धा ४३०० च्या आतच होता. तर सरासरी दर ४२०० पर्यंत होता. पण आता गणेशोत्सवाच्या काळात सोयाबीनदरात अचानक सुधारणा झाली. ही सुधारणा सट्टा बाजारातील उलाढालींमुळे झाल्याचा कयास आहे.