Sangli District Bank: सांगली जिल्हा बँकेवर प्रशासक नेमावा

Sangli News : सांगली जिल्हा मध्यवर्ती सहकारी बँकेचा कारभार संशयास्पद आहे. गैरव्यवहाराच्या अनेक प्रकरणांमध्ये चौकशीची आवश्यकता असताना अधिकारी बँकेला पाठीशी घालत आहेत. संचालक मंडळ बरखास्त करून प्रशासक नियुक्ती करावी तसेच सर्व प्रकरणांची सखोल चौकशी करावी, अशी मागणी आमदार सदाभाऊ खोत यांनी सहकारमंत्री बाळासाब पाटील यांच्याकडे केली.

त्यांनी निवेदनात म्हटले आहे, की जिल्हा बँकेच्या २०१५ ते २१ या काळातील संचालक मंडळाने केलेल्या कामकाजाबद्दल वेळोवेळी तक्रारी दाखल केल्या होत्या. त्यावर चौकशी समिती नेमली, अहवाल आला. त्यात बँकेत गैरव्यवहार झाला असल्याचे आणि बनावट कर्जवाटप झाल्याचे निदर्शनास आले आहे.

त्यावर सहकार कायदा कलम ८३ नुसार चौकशी करून पुढे कलम ८८ नुसार कारवाई करण्यासाठी सात मुद्दे पुढे आले. मात्र अनेक प्रकरणे दडपण्यात आली आहेत. चौकशी अधिकाऱ्यांवर पदाधिकारी आणि नेत्यांचा दबाव आहे. त्यातून सातपैकी चार मुद्द्यांचा समावेश करून जबाबदारी निश्चितीचे आदेश मंजूर झाले.

त्यातून तीन मुद्दे का वगळण्यात आले? त्या तीन प्रकरणांतही वसुली झाली पाहिजे. त्याची जबाबदारी निश्चित करणे आवश्यक आहे. सहकार विभागाचे अधिकारी या गैरव्यवहाराला पाठीशी घालत आहेत. या स्थितीत बँकेचे संचालक मंडळ बरखास्त करावे. प्रशासक नेमावा. संचालक मंडळावर गैरव्यवहाराची जबाबदारी निश्चित करावी. त्याची वसुली करावी. या बँकेत शेतकऱ्यांच्या, सामान्य माणसांच्या ठेवी आहेत. त्या सुरक्षित राहिल्या पाहिजेत. त्यासाठी प्रशासक नियुक्तीच झाली पाहिजे, अशी भूमिका श्री. खोत यांनी मांडली.

तीन प्रकरणांचा उल्लेख

आमदार सदाभाऊ खोत यांनी चौकशीतून वगळण्यात आलेल्या तीन प्रकरणांचा निवेदनात उल्लेख केला आहे. त्यात विटा येथील विश्वकर्मा प्लायवूडचे ६१ लाखांचे कर्ज प्रकरण, बँकेच्या ३६ शाखांच्या फर्निचर नूतनीकरणातील वाढीव रक्कम १४ लाख रुपये, तांत्रिक पदभरती सेवकांची पगारवाढ रक्कम ३५ लाख रुपये यांचा उल्लेख करण्यात आला आहे.