Khandesh Crop Harvesting : बाजरी, मका पिकांची मळणी सुरूच

Jalgaon News : खानदेशात उशिरा संकरित पेरणीची बाजरी व मका या पिकांची मळणी सुरूच आहे. तसेच भुईमूग, कांदा काढणीही आणखी १५ ते २० दिवस सुरूच राहील. मजूरटंचाई व गारपीट, वादळी पावसाने मळणीत व्यत्यय येत आहे.

मका पिकाची मळणी अंतिम टप्प्यात आहे. सध्या उशिरा लागवडीच्या क्षेत्रात मळणी सुरू आहे. आगाप पेरणीच्या आगाप लागवडीच्या मक्याची मळणी गेल्या महिन्यातच झाली. परंतु उशिरा पेरणीच्या मक्याची मळणी अद्याप पूर्ण झालेली नाही. जानेवारीच्या मध्यात पेरणी केलेल्या बाजरीची व कांद्याची काढणी सुरूच आहे.

बाजरीची पेरणी खानदेशात जळगावमधील चोपडा, जळगाव, अमळनेर, धुळ्यातील शिरपूर आदी भागांत अधिकची झाली होती. तर मक्याची लागवडदेखील खानदेशात यंदा मागील वर्षापेक्षा अधिक म्हणजेच सुमारे ९८ हजार हेक्टरवर झाली होती. मक्याची लागवड विविध टप्प्यांत झाली आहे. यामुळे अनेक दिवसांपासून मळणी, कापणी सुरू आहे. बाजरीची पेरणी डिसेंबर, जानेवारीत अनेकांनी केली आहे.

तर मका लागवड नोव्हेंबर व डिसेंबरमध्ये कमाल शेतकऱ्यांकडून करण्यात आली आहे. काहींनी मका लागवड जानेवारीतदेखील केली. मका मळणी एप्रिलच्या मध्यात सुरू वेगात सुरू झाली आहे. बाजरीची मळणीदेखील याच महिन्यात सुरू झाली आहे. कापणी, मळणीसाठी मजुरांची कमी आवश्यकता भासत आहे. उष्णता आहे. तसेच पाऊस, वादळ आणि गारपीट अनेक भागांत झाला आहे.

त्यामुळे मजुरांमध्ये भीती आहे. परंतु सातपुडा पर्वत रांगेतील आदिवासी बांधव मळणी, कापणीच्या कामासाठी चोपडा, जळगाव, शिरपूर, शहादा, धुळे, यावल आदी भागांत पोहोचले आहेत. या मंडळींची मोठी मदत या कामात होत आहे.

या मंडळींमुळे मजूरटंचाई काहीशी कमीदेखील झाली आहे. परंतु या महिन्यात सुरुवातीपासून पाऊस, वादळाची समस्या असल्याने मळणी, कापणीत व्यत्यय येत आहे. स्थानिक मजूर उष्णतेमुळे कापणीच्या कामासाठी येत नसल्याची स्थिती आहे. यामुळे मळणी लांबत असून, आणखी १०-१२ दिवस सुरू राहील, असे दिसत आहे.