Jowar Threshing : दादर ज्वारी पीक मळणी पूर्ण

Jalgaon News : खानदेशात दादर ज्वारीचे पीक जोमात होते. काही भाग वगळता पिकात मळणी पूर्ण झाली आहे. पीक बऱ्यापैकी होते. मळणी करून शेतकऱ्यांनी ज्वारीचा साठा घरात केला आहे. खानदेशात यंदा दादर ज्वारी व संकरित ज्वारीची मका पिकापेक्षा कमी पेरणी झाली होती. कोरडवाहू दादर ज्वारीची पेरणी चांगल्या पावसामुळे काहीशी वाढली.

संकरित ज्वारी, संकरित दादर ज्वारीची पेरणी बऱ्यापैकी झाली. चारा व दादर ज्वारीचे दर मागील हंगामात कमी होते. यामुळे शेतकऱ्यांनी यंदा मका, कांद्याची लागवडही केली आहे. खानदेशात सुमारे ४० हजार हेक्टरवर कोरडवाहू दादर ज्वारी, संकरित ज्वारी व संशोधित दादर ज्वारी वाणांची पेरणी झाली आहे.

तर मक्याची लागवड सुमारे दीड लाख हेक्टरवर झाली आहे. मागील तीन वर्षे मका लागवड वाढत आहे. २०२१ मध्ये खानदेशात मक्याची लागवड सुमारे ४२ हजार हेक्टरवर झाली होती. लष्करी अळीची समस्या शेतकरी फवारणी घेवून रोखतात. यामुळे मका लागवड वाढली.

कोरडवाहू दादर ज्वारीची पेरणी खानदेशात जळगाव जिल्ह्यातील जळगाव, चोपडा, अमळनेर या भागांत अधिक होती. तसेच नंदुरबारातील शहादा व धुळ्यातील शिरपूर तालुक्यांतही दादर ज्वारी पीक होते.

आगाप पेरणीच्या पिकात मळणी मागील आठवड्यातच पूर्ण झाली. दिवाळीनंतर पेरणी केलेल्या कोरडवाहू दादर ज्वारीचे पीक मळणी होऊन पीक घरात आले आहे.

संकरित ज्वारीही होतेय पक्व

विविध कंपन्यांच्या संकरित ज्वारीची पेरणीदेखील बऱ्यापैकी झाली आहे. संकरित ज्वारी पीकही जोमात आहे. तीदेखील मळणीवर आली आहे. कारण कणसे पक्व होत आहेत. काही शेतकऱ्यांनी विद्यापीठांकडून संशोधित दादर ज्वारी वाणांची पेरणी केली आहे.

काळ्या कसदार जमिनीसह मध्यम जमिनीतही पीक जोमात होते. खानदेशात दादर ज्वारीची पेरणी उशिरादेखील झाली होती. उशिरा पेरणीच्या ज्वारीतही कणसे पक्व होत आहेत. परंतु या पिकात कापणी, मळणीचे काम सध्या बंद आहे. पावसाळी वातावरण निवळल्यानंतर कापणी, मळणीचे नियोजन शेतकऱ्यांनी केले आहे.