Umed Mall : बचत गटांसाठी हक्काचे व्यासपीठ, राज्यभर १० नवीन मॉल्स उभारणार

Mumbai News : ‘‘राज्यभरातील बचत गटांना हक्काचे विक्रीचे साधन उपलब्ध व्हावे यासाठी प्रायोगिक तत्त्वावर दहा जिल्ह्यांत दहा मॉल तयार करण्यात येणार आहेत. टप्प्याटप्प्याने संपूर्ण राज्यात उमेद मॉल तयार करणार आहोत. तसेच राज्यात आगामी कालावधीत एक कोटी ‘लखपती दीदी’ करण्याचा संकल्प आहे,’’ असे प्रतिपादन मुख्यमंत्री देवेंद्र फडणवीस यांनी केले.

बांद्रा-कुर्ला संकुल, बांद्रा, मुंबई येथे ग्रामविकास व पंचायत राज विभागांतर्गत उमेद-महाराष्ट्र राज्य ग्रामीण जीवनोन्नती अभियानाच्या वतीने ११ ते २३ फेब्रुवारी दरम्यान सुरू राहणाऱ्या ‘महालक्ष्मी सरस विक्री व प्रदर्शन- २०२५’चे उद्घाटन मुख्यमंत्री फडणवीस यांच्या हस्ते झाले.

या वेळी ग्रामविकास व पंचायतराज मंत्री जयकुमार गोरे, राज्यमंत्री योगेश कदम, विभागाचे प्रधान सचिव एकनाथ डवले प्रमुख उपस्थित होते.

मुख्यमंत्री फडणवीस म्हणाले, की ‘महालक्ष्मी सरस’ हा गेली २१ वर्षे अविरत सुरू असलेला उपक्रम आहे. या माध्यमातून राज्यभरात महिला बचत गटांना एक हक्काचे व्यासपीठ मिळवून देणारा उपक्रम झाला आहे.

महिला बचत गटांच्या उत्पादनांसाठी कायमस्वरूपी उपाययोजना म्हणून जिल्हा परिषदेच्या परिसरात उमेद अभियानाच्या माध्यमातून मॉल उभारणार आहोत. यासाठी आगामी अर्थसंकल्पात तरतूद केली जाईल.

प्राथमिक स्तरावर दहा जिल्ह्यांत ‘उमेद मॉल’ उभारण्यात येतील. बचत गटांमार्फत तयार केलेली वस्तू या खासगी कंपनीच्या मालापेक्षा अत्यंत उत्कृष्ट दर्जाच्या असून त्या अत्यंत माफक दरात उपलब्ध होतात. ‘उमेद’च्या माध्यमातून ६० लाखांपेक्षा अधिक कुटुंब आर्थिक प्रगती करत आहेत.

ग्राम विकासमंत्री जयकुमार गोरे म्हणाले, की महिलांचा आर्थिक स्तर उंचावण्यासाठी शासन प्रयत्नशील असून बचत गटांच्या माध्यमातून होणाऱ्या उत्पादनांना योग्य बाजारपेठ मिळवून देणे यासाठी शासन आग्रही आहे. महिला बचत गटांच्या उत्पादित माल विक्रीचे हमखास ठिकाण मिळावे यासाठी जिल्ह्याच्या महत्त्वाच्या ठिकाणी मॉल उभारणार. तालुक्यात देखील विक्री केंद्र सुरू करण्यात येतील.

ग्रामविकास राज्यमंत्री योगेश कदम यांनीही मनोगत व्यक्त केले. या वेळी ‘उमेद’चे मुख्य कार्यकारी अधिकारी नीलेश सागर, उमेदचे मुख्य परिचलन अधिकारी परमेश्वर राऊत यांच्यासह राज्यभरातून बचत गटांच्या महिला या कार्यक्रमाला उपस्थित होत्या. ग्रामविकास विभागाचे प्रधान सचिव एकनाथ डवले यांनी आभार मानले.

११ ते २३ फेब्रुवारी दरम्यान प्रदर्शन

सरस महालक्ष्मी या प्रदर्शनाला ११ ते २३ फेब्रुवारी या कालावधीत प्रदर्शन सुरू राहणार आहे. या प्रदर्शनात अनेक प्रकारच्या कलाकुसरीच्या वस्तू, हातमागावर तयार केलेले कपडे, वुडन क्राफ्ट, बंजारा आर्ट, वारली आर्ट च्या वस्तू याशिवाय अनेक प्रकारच्या ज्वेलरी, लहान मुलांसाठी लाकडी खेळणी व इतर राज्यातील दुर्मिळ वस्तूंची रेलचेल आहे. या प्रदर्शनात एकूण ५०० पेक्षा जास्त स्टॉल लागले आहेत, त्यापैकी ९० फूड स्टॉल आहेत.