Onion Cultivation : कांदा पिकाचे उत्पादन घटल्याने शेतकरी निराश

Buldana News : तालुक्यातील कांदा पिकावर अज्ञात रोगाचे आक्रमण झाल्याने कांद्याची हिरवीगार पाल सुकत आहे. संग्रामपूर तालुक्यातील बोरखेड, सोगोडा, दानापूर शिवारांत शेतकऱ्यांनी उन्हाळी कांदा पिकाची पेरणी डिसेंबर अखेर केली.

यंत्राच्या साह्याने पेरणी केली होती. त्यानंतर उगवलेले कांदा पीक तणविरहित ठेवले. मागील पंधरा दिवसाआधीपासून कांदा पिकावर अज्ञात रोगाने आक्रमण केल्याने पीक अचानक सुकायला लागले. त्यामुळे शेतकऱ्यांनी कांदा उपटून व्यापाऱ्यांना विकणे सुरू केला आहे.

दर वर्षी या भागात एकरी दीडशे क्विंटलपर्यंत येणारे कांदा उत्पादन यावर्षी बरेच शेतकऱ्यांना एकरी ६० ते ७० क्विंटलपर्यंत आले आहे. अज्ञात रोगामुळे हे उत्पादन घटले.

शेतकऱ्याच्या कांदा १७०० ते १८०० रुपये किंटल दराने व्यापारी खरेदी करीत आहेत. या पिकासाठी पीकविमा निघत नसल्याने शेतकरी हतबल आहेत.