Sugarcane Award : सर्वोत्कृष्ट ऊस विकास संवर्धनासाठी दत्त कारखान्यास प्रथम पुरस्कार

Kolhapur News : श्री दत्त शेतकरी सहकारी साखर कारखाना लि., शिरोळ यांनी २०२३-२४ मध्ये उस विकास योजनेअंतर्गत केलेल्या विविध उपक्रमाबद्दल वसंतदादा शुगर इन्स्टिट्यूट (व्हीएसआय) पुणे यांच्याकडून दक्षिण विभागातील सर्वोत्कृष्ट ऊस विकास व संवर्धनाचा प्रथम पुरस्कार प्रदान करण्यात आला.

खासदार शरद पवार यांच्या हस्ते हा पुरस्कार प्रदान करण्यात आला. कारखान्यातर्फे उद्यान पंडित गणपतराव पाटील यांनी चेअरमन रघुनाथ पाटील, व्हाईस चेअरमन शरदचंद्र पाठक व संचालकांसमवेत पुरस्कार स्वीकारला.

ऊस विकास योजनेअंतर्गत कारखान्याच्या वतीने ऊस बियाणे बदलावर भर देऊन ऊस विकास योजनेसाठी अंदाजपत्रकामध्ये कारखान्याने निधीची तरतूद केलेली आहे. कारखान्याच्या वतीने एकरी उसाचे उत्पन्न वाढावे याकरिता वेळोवेळी शेतकरी मेळावे व प्रशिक्षण शिबिरांचे आयोजन केले जाते.

उपमुख्यमंत्री अजित पवार, शिवेंद्रराजे भोसले, बाबासाहेब पाटील, दिलीप वळसे पाटील, माजी मंत्री बाळासाहेब थोरात, हर्षवर्धन पाटील, जयंत पाटील, साखर संघाचे अध्यक्ष पी. आर. पाटील, व्हीएसआयचे महाव्यवस्थापक संभाजी कडू पाटील, साखर आयुक्त शिवाजी देशमुख आदी उपस्थित होते.