Watermelon Cultivation : खानदेशात कलिंगड लागवड रखडली

Jalgaon News : खानदेशात कलिंगडाची लागवड पावसाने रखडली आहे. लागवड यंदा वाढणार असून, सुमारे ३०० हेक्टरवर कलिंगड पीक ऑगस्टअखेर राहील, अशी स्थिती आहे. कलिंगडाची खरिपातील लागवड खानदेशात तीनही जिल्ह्यांत केली जाते. जळगाव जिल्ह्यात जामनेरमध्ये सर्वाधिक लागवड असते.

जामनेरात ७० हेक्टरवर पावसाळी किंवा खरिपातील कलिंगड लागवड पूर्ण झाली आहे. नंदुरबारातील तळोदा, शहादा भागातही लागवड केली जात आहे. या भागातील लागवड ३० टक्केही झालैली नाही. कारण पाऊस सुरू आहे.

जळगाव जिल्ह्यातही लागवड यंदा स्थिर राहील. मागील हंगामात जुलै ते ऑगस्ट या कालावधीत कलिंगडाची लागवड झाली होती. एकूण लागवड २०० हेक्टरपेक्षा अधिक झाली होती. परंतु यंदा पावसामुळे लागवड रखडत सुरू आहे. जळगाव जिल्ह्यातील जामनेर, चोपडा भागांत लागवड अधिक होणार आहे. अन्य भागांत मात्र लागवड कमी होते.

आतापर्यंत खानदेशात मिळून २०० हेक्टरवर कलिंगड लागवड झाल्याचा अंदाज आहे. ही लागवड या महिन्यातही शेतकरी करतील. ऑगस्टच्या पहिल्या आठवड्यातही लागवड होईल. पावसामुळे अनेक जण सध्या लागवड टाळत आहेत. बिया व रोपे लागवड शेतकरी करतात. ही लागवड मात्र नुकसानीच्या भीतीने केली जात नसल्याची स्थिती आहे.

कलिंगडाची लागवड या महिन्यात पूर्ण होईल, अशी अपेक्षा होती. परंतु आता उर्वरित लागवड पुढील महिन्यात होईल, अशी माहिती मिळाली. खपरिपातील कलिंगडासाठी खानदेशात जामनेर, चोपडा, धुळ्यातील शिरपूर, नंदुरबारातील तळोदा व शहादा हा भाग प्रसिद्ध आहे. यात एकट्या जामनेरातील लागवड १०० हेक्टरपेक्षा अधिक केली जाते.

यंदा जामनेरातील लागवड जूनमध्ये अधिक झाली आहे. जामनेरातील हिवरखेडा, पळासखेडा, हिंगणे, नेरी, जामनेर, सामरोद, गारखेडा, तोंडापूर व अन्य भागांत कलिंगडाची मोठी लागवड करण्यात येते. चोपड्यातही माचले, गोरगावले, सनपुले, लोणी, पंचक, यावलमधील डांभुर्णी, किनगाव, साकळी व परिसरात कलिंगड पीक असते.