Re-sowing Crisis : वरुणराजाची पाठ, दुबार पेरणीचे संकट

Beed News : अंबाजोगाई ः तालुक्यात मे व जुनच्या सुरवातीस झालेल्या पावसाच्या ओलिवर शेतकऱ्यांनी ६७ टक्के क्षेत्रावर पेरणी केली. मात्र मृग सुरू होताच पावसाने खंड दिला. त्यामुळेच अंकुरलेली पिके आता धोक्यात आहेत. म्हणजे अख्खे खरीप धोक्यात असल्याची स्थिती निर्माण झाली आहे.

जमिनीत ओल चांगली होती, म्हणून शेतकऱ्यांनी (ता.१०) जूनपर्यंत पुढे पाऊस पडेल, या आशेवर पेरणी करून घेतली. या जुन महिन्यातच फक्त ४० मिलीमीटर पावसाची नोंद आहे. तिची पेरणीपूर्व हा पाऊस आहे. हे प्रमाण मागील वर्षीच्या तुलनेत जून महिन्यात झालेल्या १०६ मिलीमीटर पावसाच्या केवळ ३७ टक्के इतकेच आहे.

तालुक्यातील खरिपाचे मुख्य पिक हे सोयाबीन आहे. त्यामुळेच एकूण पेरणी योग्य क्षेत्राच्या ९० टक्के क्षेत्रावर सोयाबीनचा पेरा होतो. यंदा झालेल्या ६७ टक्के पेरणीमध्ये जवळपास ७० ते ८० टक्के सोयाबीनचा पेरा आहे. कडक उन व हवा सुटल्यानंतर शेतकऱ्यांनी पेरणी थांबवली. मात्र तोपर्यंत ६० टक्यापेक्षा जास्त क्षेत्रावर पेरणी झाली होती.

तालुक्यात पेरणीनंतर १८ दिवस झाले पावसाचा खंड पडलेला आहे. जमिनीतील ओलाव्यावर पिके उगवली, चार पानावर आली. पण आता पावसाअभावी ही पिके धोक्यात असल्याचे चित्र आहे.

ज्या शेतकऱ्यांकडे पाणी उपलब्ध आहे, त्यांनी ठिबक आणि तुषार संचाद्वारे पिकाला पाणी देण्यास सुरवात केली आहे. त्यामुळे यांच्या पिकांना आधार झाला. मात्र कोरडवाहू शेतकऱ्यांची पिके मात्र माना टाकू लागली आहेत. आता पावसाच्या हजेरीवरच या पिकांचे भवितव्य आहे.

केवळ सात टक्के पावसाची हजेरी

तालुक्याचे सरासरी वार्षिक पर्जन्यमान ६३२ मिलीमीटर आहे. मागील वर्षी एकूण ७८० मिलीमीटर पावसाची नोंद झाली होती. नोंदविले गेले होते. चालू वर्षातील जुनपर्यंत फक्त ४० मिलीमिटर पावसाची नोंद आहे.

एवढ्याच पावसावर ६७ टक्के पेरण्या झालेल्या आहेत. म्हणजे ७९ हेक्टर पेरणीयोग्य क्षेत्रापैकी ५२ हजार ९५८ हेक्टर क्षेत्रावर पेरण्या झालेल्या आहेत. काही भागांमध्ये लवकर पेरणी करण्यात आलेली असून, विशेषतः डोंगराळ व हलक्या जमिनींमध्ये निचऱ्यामुळे पिकांवर ताण निर्माण झाला आहे.