Electricity Supply Update : खंडित वीजपुरवठ्यामुळे खानदेशात पिके संकटात

Jalgaon News : खानदेशात मागील आठवड्यातील वादळी पावसानंतर अनेक गावांत, शिवारात वीजपुरवठा सुरळीत झालेला नाही. गावांत १० ते १५ तास वीज बंद असते. शिवारातही वीज फक्त काही तास येते. यामुळे कापूस, केळी पिके संकटात आहेत.

जळगाव तालुक्यातील फुपनगरी येथील शिवार व गावात शनिवारी (ता. १०) व रविवारी (ता. ११) वीज काही तासांचा अपवाद वगळता बंद होती. पशुधनाला पिण्याच्या पाण्यासाठी वीज द्या, अशी विनवणी शेतकऱ्यांना करावी लागत आहे.

फुपनगरी शिवारातही सलग तीन दिवस वीज बंदच होती. चोपडा तालुक्यात माचले, कुरवेल, सनपुले भागातही शिवार आणि गावात वीज सुरळीत नाही. नुकतेच कुरवेल येथील वीज उपकेंद्रात मध्यरात्रीपासून ते सकाळपर्यंत शेतकऱ्यांनी विजेसाठी आंदोलन केले. किरण गुर्जर यांनी वीजपुरवठा सुरळीत करण्याची मागणी केली.

या वेळी वीज कंपनीचे अधिकारीच सुट्टी टाकून रजेवर गेल्याचे दिसून आले. यामुळे शेतकऱ्यांचा अधिकचा संताप झाला. यावल, रावेरात मागील आठवड्यात वादळ व पावसाने मोठी हानी झाली. विजेचे खांब कोसळले. त्यांची दुरुस्ती झालेली नाही. यामुळे कापूस व केळी पीक वाया जाण्याची स्थिती आहे.

नंदुरबार जिल्ह्यात सारंगखेडा (ता. शहादा) येथील वितरण कंपनीच्या कार्यालयावर टेंभा, देऊर, कमखेडा येथील शेतकऱ्यांनी मोर्चा काढत निवेदन दिले. परिसरात फक्त पाच दिवसच वीजपुरवठा मिळतो, त्यातही दिवसातून आठ ते दहा वेळेस वीजपुरवठा खंडित होतो, अशी तक्रार शेतकऱ्यांनी केली.

तापी पट्ट्यात केळी, पपई, मिरची, कापूस या प्रमुख पिकांची शेतकरी लागवड करतात. खंडित वीजपुरवठ्यामुळे पिकांना सध्या पाण्याचा प्रचंड तुटवडा निर्माण झाला आहे. याच पार्श्‍वभूमीवर शेतकरी वीज वितरण कंपनीच्या कार्यालयावर येऊन त्यांनी निवेदन सादर केले या निवेदनानंतर वीजपुरवठा सुरळीत न झाल्यास शेतकरी रस्त्यावर उतरतील, असा इशारा निवेदनात देण्यात आला आहे.

कळंबू उपकेंद्राचे काम सुरू करावे

कळंबू येथे नवीन सबस्टेशन तीन वर्षांपासून मंजूर असतानादेखील त्याचे काम अद्याप सुरू न झाल्याने शेतकरी आक्रमक झाले होते.

कळंबू येथे सबस्टेशन सुरू झाल्यावर सारंगखेडा सबस्टेशनवरील भार कमी होऊन सर्व शेतकऱ्यांना सुरळीत वीजपुरवठा मिळणार असल्याने मंजूर झालेले सबस्टेशनच्या कामाला त्वरित सुरूवात करावी, अशी मागणी शेतकऱ्यांनी केली आहे.