Crop Loan: गेल्या वर्षी पीककर्ज वाटपाचा उच्चांक

Pune News: पुणे जिल्ह्यामध्ये २०२४-२५ मधील आर्थिक वर्षात शेतकऱ्यांना सात हजार ९२० कोटी रुपयांचे पीककर्ज वाटप करण्यात आले होते. सलग चौथ्या वर्षी जिल्ह्यात कर्जवाटपाचा उच्चांक झाला आहे. हे वाटप उद्दिष्टापेक्षाही अधिक झाले आहे. सर्वाधिक कर्ज देण्यात सरकारी बॅंका आघाडीवर आहेत.

या वर्षी सहा हजार ३७० कोटी रुपये पीककर्जाचे उद्दिष्ट ठेवण्यात आले होते. त्या तुलनेत एक हजार ९५० कोटी रुपये अधिक कर्जवाटप करून उद्दिष्टाच्या १२४ टक्के कामगिरी झाली आहे. यामध्ये मत्स्य व्यवसाय व पशुपालनासाठी २० कोटी रुपये कर्जपुरवठा करण्यात आला आहे.

जिल्ह्यात २०२३-२४ या आर्थिक वर्षात सहा हजार ९३० कोटी, तर त्यापूर्वी २०२२-२३ मध्ये पाच हजार २० कोटी रुपये पीककर्ज वाटप झाले होते. त्या अगोदर २०१५-१६ मध्ये तीन हजार ५०६ कोटी ३१ लाख रुपये कर्जवाटप करण्यात आले होते. त्यानंतर हा २०२१-२२ मध्ये मागचा उच्चांक मोडला आणि त्यानंतर सलग चार वर्षे पीककर्ज वाटपाचा नवीन विक्रम होत आहेत.

मागील चार वर्षे वार्षिक पतपुरवठा आराखडा योजनेनुसार ठरविण्यात आलेले उद्दिष्ट पार करून जिल्ह्यात कर्जवाटप केले आहे. जिल्ह्यात २०२१-२२ मध्ये ८३ हजार २९७ कोटींचे उद्दिष्ट ठेवण्यात आले. प्रत्यक्षात दोन लाख पाच हजार २५९ कोटी, २०२२-२३ मध्ये एक लाख १७ हजार ७१६ कोटींच्या उद्दिष्टासमोर दोन लाख ७० हजार ९२५ कोटींचे आणि २०२३-२४ मध्ये जिल्ह्यात तीन लाख एक हजार ६०० कोटींच्या उद्दिष्टासमोर दोन लाख ७३ हजार ९७ कोटी कर्जवाटप झाले.

तर यावर्षी मार्चअखेर तीन लाख ५३ हजार ५२२ कोटींचे विक्रमी कर्जवाटप झाले आहे. जिल्हाधिकारी जितेंद्र डुडी यांनी २०२५-२६ च्या आर्थिक वर्षासाठी जिल्ह्याचा पतपुरवठा आराखडा तीन लाख ६२ हजार कोटींचा करण्याच्या सूचना दिल्या आहेत.

बँका उद्दिष्ट (कोटीत) प्रत्यक्ष वाटप (कोटीत) टक्के

सरकारी बँका १८७१ ३४१३ १८२.४२

खासगी बँका १३१११ १५१० ११.५२

जिल्हा बँक ३१७५ २९९१ ९४.२०

एकूण ६३७० ७९२० १२४.३३