Cotton Seed : शेतकऱ्यांकडून कपाशी बियाणे खरेदी सुरू

Akola News : खरीप हंगाम तोंडावर असताना कपाशीच्या बियाण्यांची विक्री बाजारपेठेत गुरुवार (ता. १६) पासून सुरू झाली. मात्र नेहमीप्रमाणे दिसणारी गर्दी यंदा पहिल्याच दिवशी फारशी जाणवली नाही. गेल्या वर्षी अकोल्यात एका नामांकित कंपनीच्या विशिष्ट वाणांसाठी शेतकरी पहाटेपासून रांगा लावत असल्याचा प्रकार घडला होता. त्या तुलनेत यंदा बाजारपेठेत सामसूम वातावरण पाहायला मिळत आहे.

अकोला जिल्ह्यात या वर्षात सुमारे सव्वादोन लाख हेक्टरपेक्षा अधिक क्षेत्रावर कपाशीची पेरणी होऊ घातली आहे. प्रामुख्याने खारपाण पट्ट्यात काही विशिष्ट वाणांची मागणी राहते. गेल्या हंगामातील उत्पादनाकडे पाहता या वर्षी ‘रांगा’ लागलेल्या वाणापेक्षा दुसरे वाण बाजी मारण्याची शक्यता आहे.

मागील वर्षी मोठ्या गाजावाजात खरेदी झालेल्या ‘त्या’ कंपनीच्या बियाण्याने अपेक्षेप्रमाणे उत्पादन दिले नाही, असा काही शेतकऱ्यांचा अनुभव होता. परिणामी, यंदा त्या वाणाबाबत शंका निर्माण झाली असून त्याचा परिणाम मागणीवर होण्याची चिन्हे सध्या आहेत.

दुसरीकडे, एका दुसऱ्या कंपनीच्‍या वाणाने उत्पादनात बाजी मारल्याने शेतकऱ्यांची पसंती त्याकडे वळण्याची शक्यता आहे. त्या वाणाबाबत यंदा अधिक उत्सुकता असून मागणी वाढण्याची चिन्हे पाहता कंपनीकडूनही मोट्या प्रमाणात कपाशी बियाण्यांची पाकिटे उपलब्ध करून देण्यात आल्याचे कृषी विभागाकडून सांगण्यात आले.

गेल्या वर्षी ज्या वाणासाठी रांगा लावल्या, ते अपेक्षेवर उतरले नाही. यंदा अनुभवाने शिकून निर्णय घ्यायचा, असे एका शेतकऱ्याने सांगितले. त्यामुळे मागील हंगामात गर्दीचा केंद्रबिंदू ठरलेले वाण यंदा मागे पडणार का, हा प्रश्‍न उपस्थित झाला आहे.