Coriander Rate : कोथिंबीर अमरावतीत दबावात, नागपुरात तेजीत

ॲग्रोवन वृत्तसेवा
Vegetable Market : नागपूर ः वाढती मागणी आणि त्या तुलनेत पुरवठा कमी या कारणामुळे विदर्भातील बहुतांश भाजी बाजारात कोथिंबिरीचे दर तेजीत आले होते. अमरावती येथील फळ आणि भाजी बाजारात ७००० ते १०००० रुपये क्‍विंटलने कोथिंबिरीचे व्यवहार झाले. आता कोथिंबिरीचे दर चार हजार ते सहा हजार रुपयांवर आले आहेत. नागपूरच्या कळमना बाजारात मात्र दर आठ हजार ते दहा हजार रुपयांवर होते. बाजारातील कोथिंबिरीची आवक २० क्‍विंटल इतकी अत्यल्प आहे.

अमरावती बाजाराचा विचार करता गेल्या आठवड्यात कोथिंबीर ६००० ते ८००० रुपयांनी या ठिकाणी विकली गेली. या वेळी आवकही २० क्‍विंटलच्या घरात होती. त्यानंतर शुक्रवार (ता.२८ ) पर्यंत या दरात सुधारणा होत हे दर ७००० ते १०००० रुपयांवर पोचले. आता अमरावती बाजारात कोथिंबिरीचे दर दबावात आले आहेत. चार हजार ते सहा हजार रुपयांनी या ठिकाणी व्यवहार होत असल्याची माहिती व्यापारी सूत्रांनी दिली.

नागपूरच्या कळमना बाजारात आवक २०० क्‍विंटलवर स्थिर असताना दरात मात्र मोठे चढ-उतार अनुभवले जात आहेत. जूनच्या सुरवातीला या बाजारात ६००० ते १०००० रुपये असा कोथिंबिरीचा दर होता. त्यानंतर ६००० ते ८००० रुपयांनी काही काळ व्यवहार झाले. जूनच्या पंधरवड्यात ४००० ते १०००० रुपये दर मिळाला. ६००० ते ९००० आणि त्यानंतरचे काही दिवस ७००० ते १२००० रुपयांनी या ठिकाणी कोथिंबिरीचे व्यवहार होत असल्याचे व्यापारी सूत्रांकडून सांगण्यात आले. कळमना बाजारात सद्यःस्थितीत आठ हजार ते दहा हजार रुपयांनी कोथिंबिरीचे व्यवहार होत असल्याचे सांगण्यात आले.