Co-operative Societies Election : विधानसभा निवडणुकांमुळे सहकार संस्थांच्या निवडणुका पुन्हा ढकलल्या पुढे

Assembly Election Maharashtra : विधानसभा निवडणुकीच्या कार्यक्रमामुळे राज्‍यातील सहकारी संस्थांच्या निवडणुकांना तिसऱ्यांदा स्थगिती देण्यात आली आहे. २०२४-२५ या वर्षातील २९ हजार ४२९ सहकारी संस्थांच्या निवडणुका अद्याप प्रलंबित आहेत. त्यापैकी ७ हजार १०९ सहकारी संस्थांची निवडणूक प्रक्रिया सुरू आहे.

दरम्यान, कोल्हापूर जिल्ह्यातील सुमारे तीन हजार संस्थांचा यामध्ये समावेश आहे. अ वर्गातील एकाही संस्थेचा यात समावेश नाही, तर ब, क आणि ड वर्गातील संस्थांचा समावेश आहे. स्थानिक सहकारी संस्थांच्या निवडणुकीचा परिणाम विधानसभेसह जिल्ह्यातील राजकारणावर होणार असल्याने सरकारकडून हा निर्णय घेतला असल्याचे बोलले जात आहे.

जून २०२४ मध्ये राज्यातील पावसाची परिस्थिती विचारात घेऊन ३० सप्टेंबर २०२४ पर्यंत निवडणूक स्थगित केली होती. तत्पूर्वी लोकसभा निवडणूक आचारसंहितेमुळे स्थगिती दिली होती. आता विधानसभा निवडणुकीमुळे ३१ डिसेंबर २०२४ पर्यंत ही निवडणूक स्थगित केली आहे. त्यामुळे सहकारी संस्थांच्या निवडणुका आता थेट पुढील वर्षात होणार आहेत.

याबाबतचे आदेश अवर सचिव अनिल चौधरी यांनी प्रसिद्ध केले आहेत. महाराष्ट्र शासनाच्या संकेतस्थळावर सुद्धा हे आदेश उपलब्ध आहेत.

२९ हजार ४४३ संस्थांची निवडणूक प्रक्रिया होती सुरू

राज्य सहकारी निवडणूक प्राधिकरणाच्या अहवालानुसार २९ हजार ४४३ सहकारी संस्थांची निवडणूक प्रक्रिया १ ऑक्टोबरपासून सुरू करण्यात आली होती. यात 'अ' वर्गातील ४२, 'ब' वर्गातील १ हजार ७१६, 'क' वर्गातील १२ हजार २५० आणि 'ड' वर्गातील १५ हजार ४३५ संस्थांचा समावेश आहे. त्यापैकी ७ हजार १०९ सहकारी संस्थांची निवडणूक प्रक्रिया सुरू होती.