Amaravati ZP : अमरावती ‘झेडपी’त पडली संघर्षाची ठिणगी

Amaravati News : जिल्हा परिषदेच्या उमेद अभियानातील कंत्राटी कर्मचारी आणि जिल्हा ग्रामीण विकास यंत्रणेच्या प्रकल्प संचालकामधील वाद चांगलाच चिघळला आहे. एका कंत्राटी महिला कर्मचाऱ्याने प्रकल्प संचालकांवर आरोप करीत आत्महत्येचा प्रयत्न केल्यानंतर हा वाद अधिक चिघळला. याप्रकरणी उमेदच्या कंत्राटी कर्मचाऱ्यांनी प्रकल्प संचालकांविरोधात मुख्य कार्यकारी अधिकाऱ्यांकडे तक्रार दिली आहे.

महाराष्ट्र राज्य ग्रामीण जीवन्नोती अभियानांतर्गत एका कंत्राटी महिला कर्मचाऱ्याने विष प्राशन करून आत्महत्येचा प्रयत्न केला होता. जिल्हा ग्रामीण विकास यंत्रणेच्या प्रकल्प संचालकांच्या मानसिक त्रासामुळे आपण हे पाऊल उचलत असल्याचे सदर महिलेकडून सांगण्यात आले. त्यानंतर उमेदच्या कंत्राटी कर्मचारी कल्याणकारी संघटनेकडून जिल्हाधिकारी तसेच जिल्हा परिषदेच्या मुख्य कार्यकारी अधिकाऱ्यांकडे तक्रार देण्यात आली आहे.

उमेद अभियानात जिल्हा व तालुकास्तरावर जवळपास १२० कंत्राटी कर्मचारी कार्य करीत असून त्यांना विविध प्रकारे प्रकल्प संचालकांकडून मानसिक दृष्टीने त्रास दिल्या जात असल्याचा आरोप कर्मचाऱ्यांनी आपल्या तक्रारीतून केला आहे. कंत्राटी कर्मचाऱ्यांचे केआरए वेळेवर न करणे, त्याला जाणूनबुजून वेळ लावणे,

कर्मचाऱ्यांना वेतनासाठी तीन ते चार महिने ताटकळत ठेवणे, कर्मचाऱ्यांना खोट्या तक्रारी करण्यास भाग पाडणे, सुटीच्या दिवशीसुद्धा कर्मचाऱ्यांना काहीच काम नसताना कार्यालयात येण्यास भाग पाडणे, स्वतःच्या मर्जीतील कंत्राटदाराला कंत्राट मिळावा, यासाठी प्रयत्न करणे आदी आरोप या निवेदनातून कर्मचाऱ्यांनी केले आहेत.

त्यातच अभियानातील कंत्राटी महिला कर्मचाऱ्याने आत्महत्येचा प्रयत्न केला असून त्यांच्यावर सध्या जिल्हा सामान्य रुग्णालयात उपचार सुरू आहेत. संबंधित महिलेच्या आईसह उमेदचे कर्मचारी जिल्हा परिषदेवर धडकले आणि प्रकल्प संचालक मनमानी करीत असल्याचा आरोप केला. त्यामुळे प्रशासनात चांगलीच खळबळ उडाली आहे.