Pune Heavy Rain: ताम्हिणी घाटमाथ्यावर २१० मिलिमीटरची नोंद

Pune News: गेल्या दोन ते तीन दिवसांपासून पुणे जिल्ह्याच्या पश्चिम पट्ट्यात पावसाचा जोर वाढला आहे. प्रामुख्याने घाटमाथ्यावर जोर अधिक आहे. शुक्रवारी (ता. २५) सकाळी आठ वाजेपर्यंत ताम्हिणी घाटमाथ्यावर सर्वाधिक २१० मिलिमीटर पाऊस पडल्याची नोंद झाली. तर मुठा, नीरा आणि कुकडी धरणक्षेत्रांत चांगलाच पाऊस पडत असल्याने धरणांतील पाण्याच्या आवकेत वाढ झाली आहे. त्यामुळे धरणांतून विसर्ग वाढविण्यात येत आहे.

मागील पंधरा दिवस घाटमाथ्यावर पावसाचा प्रभाव कमी झाला होता. परंतु गेल्या तीन दिवसांपूर्वी पावसासाठी पोषक वातावरण तयार झाले आहे. त्यामुळे घाटमाथ्यावर पुन्हा जोरदार पाऊस कोसळत आहे. ताम्हिणी घाटमाथ्यानंतर लोणावळा घाटमाथ्यावर १३७ मिलिमीटर पाऊस पडला. तर वळवण ८५, कुंडली ६०, शिरोटा ३१, ठोकरवाडी घाटमाथ्यावर २७ मिलिमीटर पाऊस पडला.

धरणक्षेत्रात पावसाची संततधार सुरू आहे. त्यामुळे भात खाचरे पुन्हा भरून वाहू लागली आहे. मुळशी धरण क्षेत्रात ११० मिलिमीटर पाऊस पडला. तर मुठा खोऱ्यातील टेमघर धरणक्षेत्रात ४४ मिलिमीटर, वरसगाव २०, पानशेत १८ मिलिमीटर पाऊस झाला. तर खडकवासला धरणक्षेत्रात तुरळक सरी कोसळल्या. नीरा खोऱ्यातील नीरा देवघर धरणक्षेत्रात ५१ मिलिमीटर, गुंजवणी ३०, वडिवळे ४२, आंध्र २२, पवना ४५ मिलिमीटर पाऊस पडला.

तर कासारसाई, कळमोडी, चासकमान, भामा आसखेड, नाझरे, भाटघर, वीर या धरणक्षेत्रात तुरळक सरी पडल्या. कुकडी धरण क्षेत्रातील पिंपळगाव जोगे, येडगाव, माणिकडोह, डिंभे, चिल्हेवाडी धरणक्षेत्रात तुरळक सरी बरसल्या. झालेल्या पावसामुळे मागील चोवीस तासांमध्ये जिल्ह्यातील एकूण २६ धरणांत नव्याने २.७१ टीएमसी पाण्याची आवक झाली असून धरणांतील उपयुक्त पाणीसाठा १६३.५५ टीएमसी म्हणजेच ८२ टक्क्यांवर गेला आहे.

पवना, मुळशी नदीकाठच्या नागरिकांना सूचना

पवना, मुळशी धरणांत ७५ टक्क्याहून अधिक पाणीसाठा झाला आहे. पाणलोट क्षेत्रात पाऊस चालू असून धरणांमध्ये पाण्याची मोठी आवक होत आहे. पवना धरणातील पाणीसाठा नियंत्रित करण्याकरिता सकाळी ११ वाजता सांडव्यावरून नदीपात्रामध्ये नियंत्रित पद्धतीने १४०० क्युसेक्स विसर्ग करण्यात आला आहे.

तरी पाणलोट क्षेत्रातील पावसाच्या प्रमाणानुसार व येव्यानुसार धरणातून नदीपात्रात होणारा विसर्ग पुन्हा कमी किंवा जास्त केला जाऊ शकतो. नदीकाठच्या सर्व नागरिकांनी नदीपात्रात उतरू नये. नदीमधील पाण्याचे पंप, नदी काठचे शेती अवजारे व तत्सम साहित्य अथवा पशुधन असल्यास ती तत्काळ सुरक्षित ठिकाणी हलविण्यात यावीत, अशा नागरिकांना सूचना जलसंपदा विभागाने दिल्या आहेत.