Pune APMC : बाजार समितीत एकीकडे स्वच्छता मोहीम, दुसरीकडे कचऱ्याचे साम्राज्य

Pune News : महात्मा गांधी यांच्या जयंतीच्या निमित्ताने देशात स्वच्छता पंधरवडा साजरा केला जात आहे. यानिमित्ताने पुणे कृषी उत्पन्न बाजार समितीमध्ये संचालक मंडळ आणि प्रशासनाने स्वच्छता अभियानासाठी नवे कोरे खराटे आणून काही वेळ झाडण्याचे फोटो सेशन केले.

मात्र दुसरीकडे संपूर्ण बाजार आवारात कचऱ्याचे ढीग आणि मोकाट जनावरांचा सुळसुळाट होता. मोकाट जनावरांचा जथ्था मुख्य प्रवेशद्वारातून आत प्रवेश केल्यावर बाजार समितीच्या संचालकांच्या गाळ्यासमोरच ठाण मांडून होता. या मोकाट जनावरांमुळे अडते मेटाकुटीला आले आहेत.

पुणे बाजार समितीमध्ये कचऱ्याची समस्या वाढत आहेत. नियमित होणारी स्वच्छतादेखील व्यवस्थित होत नसल्याच्या तक्रारी आडत्यांकडून केल्या जात आहेत. त्यातच आता मोकाट जनावरांचा देखील त्रास वाढला असून, मोठ्या प्रमाणावर मोकाट जनावरे बाजार आवरात फिरत असून, ते फळे आणि भाजीपाल्याचे नुकसान करत आहेत.

याकडे प्रशासनाचे दुर्लक्ष होताना दिसत आहे. एकीकडे मोठ्या प्रमाणावर सुरक्षा रक्षाकांची नियुक्ती केली आहे. मात्र अनेक सुरक्षारक्षक प्रत्यक्ष कामावर हजर नसल्याचे चित्र आहे. यामुळे विविध प्रवेशद्वारांमधून मोकाट जनावरे बाजार आवारात फिरत असल्याचे चित्र आहे.

दरम्यान, रविवारी (ता. १) स्वच्छता पंधरवड्यानिमित्त सर्वत्र ‘स्वच्छता ही सेवा’ अभियान राबविण्यात येत असताना, बाजार समितीने देखील या अभियानांतर्गत स्वच्छतेसाठी ‘एक तारीख एक तास’ या मोहिमेअंतर्गत बाजार आवारातील स्वच्छता करण्याचा कार्यक्रम हाती घेतला होता. यासाठी नवेकोरे खराटे आणून केवळ फोटो सेशन पुरते खराटे मारण्यात आले.

या वेळी सभापती दिलीप काळभोर, उपसभापती रवींद्र कंद, सचिव डॉ. राजाराम धोंडकर, संचालक गणेश घुले, अनिरुद्ध भोसले अधिकारी, कर्मचारी, अडते, व्यापारी, शेतकरी, हमाल, तोलणार, कामगार व विविध संघटनांचे पदाधिकारी उपस्थित होते.