Agriculture Solar Scheme : मुख्यमंत्री सौर कृषिवाहिनी योजनेचा राष्ट्रीय सन्मान

Nashik News : मुख्यमंत्री देवेंद्र फडणवीस यांनी शेतकऱ्यांना कृषिपंपांसाठी दिवसा वीजपुरवठा व्हावा म्हणून सुरू केलेल्या मुख्यमंत्री सौर कृषिवाहिनी योजना २.० या योजनेला ऊर्जा क्षेत्रातील सर्वोत्कृष्ट कामगिरीसाठी प्रतिष्ठेचा स्कॉच सुवर्ण राष्ट्रीय पुरस्कार प्रदान करण्यात आला. त्याचबरोबर महावितरणच्या सौर ग्रामयोजनेला स्कॉच रजत पुरस्कार मिळाला.

महावितरणचे अध्यक्ष तथा व्यवस्थापकीय संचालक लोकेश चंद्र यांनी शनिवारी नवी दिल्ली येथे हे पुरस्कार स्वीकारले. स्कॉच समूहातर्फे दर वर्षी सार्वजनिक क्षेत्रात उपयुक्त ठरलेल्या विविध योजनांसाठी पुरस्कार देण्यात येतात.

विविध तज्ज्ञांकडून अत्यंत काटेकोरपणे परीक्षण होऊन परीक्षकांच्या मतांच्या आधारे हे पुरस्कार दिले जातात. सार्वजनिक क्षेत्रातील योजनांसाठीचे हे पुरस्कार प्रतिष्ठेचे मानले जातात.

मुख्यमंत्री देवेंद्र फडणवीस यांच्या हस्ते एप्रिल २०२३ मध्ये ही योजना सुरू झाल्यानंतर गतीने अंमलबजावणी सुरू आहे.

आतापर्यंत ४९ प्रकल्प पूर्ण झाले असून, त्यांची क्षमता २०३ मेगावॉट आहे. मार्च २०२६ पर्यंत ही योजना पूर्ण होईल व राज्यातील सर्व कृषिपंप सौरऊर्जेवर चालविण्याचे स्वप्न पूर्ण होईल.