Poultry Business : विदर्भासाठी पोल्ट्री व्यवसाय धोरणात बदल करा

Amravati News : करारदार कंपन्यांद्वारा कुक्‍कुटपक्ष्यांचा प्रती किलो दर दुपारी निश्‍चित झाल्यानंतर सायंकाळी मागणी नसल्याचे सांगत कमी दरात व्यापाऱ्यांना पुरवठा होतो. याचा फटका वैयक्‍तिकस्तरावर शेतीपूरक व्यवसाय करणाऱ्या कुक्‍कुटव्यवसायिकांना होत असल्याने किमान विदर्भासाठी या धोरणात बदल करावा, अशी मागणी करण्यात आली आहे.

महाराष्ट्र पोल्ट्री योद्धा फेडरेशनच्या वतीने अतुल पेरसपुरे, शुभम महाले यांच्या नेतृत्वात व्यंकटेश्‍वर इंडिया लिमिटेडच्या व्यवस्थापकीय संचालिका अनुराधा देसाई यांच्या नावे देण्यात आलेल्या निवेदनातून ही मागणी करण्यात आली आहे.

निवेदनानुसार, विदर्भातील बहुतांश जिल्‍ह्यात शेतीमधून अपेक्षित उत्पादकता आणि उत्पन्न होत नसल्याने त्यापार्श्‍वभूमीवर या भागात शेतीपूरक व्यवसायाला प्रोत्साहन देण्याचे शासनाचे धोरण आहे. अमरावती, नागपूर जिल्ह्यात पोल्ट्री व्यवसाय मोठ्या प्रमाणात रुजला आहे. करारदार कंपन्यांद्वारे रोज दुपारी दीड वाजता मोबाइल कॉन्फरन्सच्या माध्यमातून दर निश्‍चित केला जातो.

या कॉन्फरन्समध्ये शेतकरी प्रतिनिधींचा देखील समावेश असतो. हा दर निश्‍चित झाल्यानंतर त्यानुसार ओपन पोल्ट्री व्यवसाय करणारे कुक्‍कुटपालक व्यापाऱ्यांशी पक्षी विक्रीचा व्यवहार करतात. त्याचवेळी सायंकाळी कंपन्यांद्वारे व्यापाऱ्यांना कमी दरात कुक्‍कुटपक्षी विक्री होते. मागणी नसल्याचे कारण कंपन्या त्यामागे देतात. परिणमी सर्वदूर बाजार गडगडतो आणि कमी क्षमतेत पोल्ट्री व्यवसाय करणाऱ्या शेतकऱ्यांना मोठा फटका बसतो.

हे धोरण अन्यायकारक असल्याने यावर तोडगा निघावा याकरिता पशुपालकांकरिता बैठकीचे आयोजन कंपनीस्तरावर करण्यात यावे, अशी मागणी करण्यात आली. संदीप गोळे, सतीष गवई, अमित कांबे, संजय गायकवाड, उमेश बिजवे, नईम सौदागर, रजत गावंडे, भरत ठाकरे, अनुराग धानोकर, इद्रीस सैफी, अनिल अग्रवाल, आकाश खुरद, बाळा सांगोले, विजय पुंड, दिपक अढाऊ, अभय बोंडे, गिरीश घटोळे, विशाल ताजे, बळवंत कांबे, पदमाकर देशमुख यांचा समावेश होता.