Sugarcane Harvester : चांगतपुरी गावची पंजाब आणि हरियानाशी स्पर्धा

Chh. Sambhajinagar News : शेतीत जसे कष्ट आहेत, तसा धोकाही आहे. त्यामुळेच अनेक शेतकरी पुत्र शेतीला नाही म्हणतात. पण, जिल्ह्यातील चांगतपुरी (ता. पैठण) या दीड हजार उंबऱ्यांच्या गावातील शेतकरी पुत्रांनी शेतीलाच सर्वस्व मानले.

एवढेच नाही तर या क्षेत्रातील गरज ओळखून त्या दिशेने पावले टाकली. या इवल्याशा गावात आज एक-दोन नव्हे तर तब्बल नऊ ‘हार्वेस्टर’ झाले. त्यांना मराठवाडाभरातून मागणी आहे. त्यामुळे चांगतपुरीवासीयांच्या मातीची अस्मिता सर्वत्र पोचली. आता हार्वेस्टरच्या बाबतीत या गावाची स्पर्धा पंजाब आणि हरियानाशी आहे.

पूर्वी ऊसतोडीसाठी हार्वेस्टर हवे असल्यास थेट पंजाब किंवा हरियानात संपर्क करावा लागत असे. तेथील हार्वेस्टर मालकही तीन-चार शेतकऱ्यांसाठी हार्वेस्टर पाठवू शकत नव्हते.

त्यांना किमान ३० ते ४० शेतकऱ्यांकडून ऑर्डर असेल तरच ते हार्वेस्टर पाठवत. त्यासाठी दरही जास्त आकारत असत. त्यामुळे मराठवाड्यातील मोजकेच आणि मोठे शेतकरी जास्त पैसे देऊन या राज्यांतून हार्वेस्टर मागवून घेत.