Sugarcane Harvesting : निवडणूक आटोपली, खानदेशात ऊस तोड सुरू करा

Nandurbar News : खानदेशात यंदा ऊस तोडणी अजूनही सुरू झालेली नाही. निवडणुकांमुळे ही कार्यवाही रखडली आहे. निवडणुका आटोपल्या आहेत. ऊस तोडणी लवकरात लवकर सुरू करा, असा मुद्दा ऊस उत्पादक उपस्थित करीत आहेत.

ऊस लागवड खानदेशात वाढली आहे. यंदा आणखी लागवड वाढेल. अनेक गावांतील शेतकऱ्यांनी मोठ्या प्रमाणावर उसाची लागवड केली आहे. ऊस लागवड केली, पण त्याची तोडणी, गाळप यंदा लांबले आहे. यामुळे उतारा कमी मिळेल, अशी स्थिती आहे. यातच गेल्या पाच वर्षांपासून खांडसरी तसेच कारखाने यांच्याकडून उसाला योग्य तो हमीभाव मिळत नसल्याची खंत शेतकऱ्यांमधून व्यक्त होत आहे.

ऊस तोडणी वेळेत सुरू नाही. यामुळे उसाला पुढील काळात योग्य भाव मिळावा, अशी अपेक्षा शेतकऱ्यांमधून व्यक्त करण्यात येत आहे. पावसाळा नुकसानकारक ठरला. आता थंडीचे आगमन झाले आहे. ऑक्टोबरमध्ये ऊसगाळप सुरू होईल, असे संकेत होते. पण गाळप सुरू झालेले नाही.

खानदेशात अधिकचे उत्पन्न देणारे पीक म्हणून उसाची लागवड आपापल्या शेतात करीत असतात. नंदुरबारात ऊस सुमारे १४ हजार हेक्टरवर आहे. जळगावात सुमारे १२ हजार हेक्टरवर आणि धुळ्यात सुमारे पाच हजार हेक्टरवर ऊस पीक आहे.

पपई, केळी आदी पिकांना पर्याय म्हणून तालुक्यातील असंख्य शेतकऱ्यांकडून उसाला प्राधान्य देण्यात येते. ऊस हे बारमाही पीक असून, त्याला मोठ्या प्रमाणात खत, उसाचे महागडे बियाणे, लागवड खर्च, तण काढणे, ठिबक सिंचन आदींवर मोठा खर्च येतो. महागाई वाढली असून, याचा फटका शेतकऱ्यांना सहन करावा लागत आहे.

ऊसदराबाबत शेतकऱ्यांची नाराजी

लहरी हवामान, अवकाळी पाऊस, ढगाळ वातावरण आदी समस्यांना शेतकरी बांधव तोंड देतात. मेहनत घेऊन पिकविलेल्या शेतीमालास योग्य हमीभाव मिळत नसल्याने शेतकरी नाराज आहे.

अडचणीतही न खचता मोठ्या आशेने व जोमाने शेतात शेतकरी राबत असतो. मागील पाच ते सात वर्षांपासून उसाचा दर १६५० ते २५५० यातच अडकला आहे. दरांबाबत व वेळेत ऊस गाळप हंगाम सुरू करण्याबाबतची अपेक्षा आहे. चालू वर्षाच्या गळीत हंगामात उसाला तीन हजार रुपये किंवा त्यापेक्षा अधिकचा प्रतिटन हमीभाव मिळावा, अशी अपेक्षा ऊस उत्पादक शेतकऱ्यांकडून व्यक्त करण्यात येत आहे.