PM Kisan Installment : पीएम किसान योजनेत वंचित शेतकऱ्यांचा समावेश करणार; मागील हप्ता जमा करण्याचीही केंद्रीय कृषिमंत्र्यांची ग्वाही

PM Kisan Scheme : केंद्र सरकार पंतप्रधान किसान सन्मान निधी योजनेच्या लाभासाठी पात्र असलेल्या सर्व शेतकऱ्यांना लाभ देण्यासाठी तयार आहे. तसेच या योजनेच्या लाभापासून वंचित राहिलेल्या सर्व शेतकऱ्यांना मागील हप्ता जमा करण्यात येणार असल्याची ग्वाही केंद्रीय कृषिमंत्री शिवराजसिंह चौहान यांनी मंगळवारी (ता.११) संसदेत दिली आहे. त्यामुळे आता जे शेतकरी पीएम किसानसाठी पात्र असूनही लाभापासून वंचित राहिले, अशा सर्व पात्र शेतकऱ्यांना लाभ देण्यात येणार असल्याचं केंद्रीय कृषिमंत्र्यांनी स्पष्ट केलं आहे.

केंद्रीय अर्थसंकल्पीय अधिवेशनात तामिळनाडूच्या पात्र शेतकऱ्यांना पीएम किसानचा लाभ मिळत नसल्याचा मुद्दा तामिळनाडूच्या खासदारांनी उपस्थित केला. त्यावर कृषिमंत्री शिवराजसिंह चौहान यांनी उत्तर दिलं.

चौहान म्हणाले, "जर शेतकरी या योजनेच्या लाभापासून वंचित राहिले असतील तर अशा वंचित शेतकऱ्यांना पीएम किसान सन्मान निधी योजनेचा लाभ देण्यासाठी राज्य सरकारांनी केंद्र सरकारला मदत करावी. तसेच या शेतकऱ्यांना पीएम किसानचा मागील हप्ता देण्यासाठी सरकार प्रयत्न करेल." असंही कृषिमंत्र्यांनी संसदेत सांगितलं.

पीएम किसानचा लाभ देण्यासाठी राज्य सरकारांनी केंद्र सरकारला मदत करावी, अशी सूचना कृषिमंत्र्यांनी केली आहे. कृषिमंत्री म्हणाले, "राज्य सरकारांनी पीएम किसानच्या पोर्टलवर वंचित शेतकऱ्यांची माहिती अद्ययावत करावी. तसेच सीएससी सेंटरवरून अर्जही दाखल करून घ्यावेत. या पात्र वंचित शेतकऱ्यांनाही पीएम किसान योजनेत सहभागी करून घेण्यात येईल. या शेतकऱ्यांना लाभ देण्यासाठी एकदिवसांची विलंब करण्यात येणार नाही," अशी ग्वाही कृषिमंत्र्यांनी दिली.

पुढे ते म्हणाले, "मी तामिळनाडूला दोन वेळेस भेट दिली आहे. कृषी खात्याच्या कामानिमित्त आणि ग्रामविकास खात्याच्या कामानिमित्त भेट दिली आहे. दोन्ही वेळेस तामिळनाडूचे ग्रामविकास आणि कृषिमंत्री बैठकीला आले नाहीत. परंतु आम्ही शेतकऱ्यांशी चर्चा केली आहे. तामिळनाडूच्या शेतकऱ्यांचा आम्हाला आदर आहे." असंही कृषिमंत्री म्हणाले.

दरम्यान, केंद्र सरकार पीएम किसान योजना राबवतं. डिसेंबर २०१८ पासून या योजनेची सुरुवात करण्यात आली. शेतकऱ्यांना ६ हजार रुपये वार्षिक मदत तीन टप्प्यात शेतकऱ्यांना दिली जाते. अलीकडेच पंतप्रधान नरेंद्र मोदी यांनी बिहारच्या भागलपुरमध्ये आयोजित एका कार्यक्रमात शेतकऱ्यांना १९ व्या हप्त्याचं वितरण केलं.

१९ व्या हप्त्यासाठी देशातील ९.८ कोटी शेतकरी पात्र ठरली. त्यामध्ये २.४१ कोटी महिला शेतकऱ्यांचा समावेश आहे. १९ व्या हप्त्यासाठी २२ हजार कोटींचा निधी वितरित करण्यात आला आहे. शेतकरी मात्र सन्मान निधीऐवजी शेतमालाला किफायतशीर दर द्यावा. तसेच आयात निर्यात धोरण राबवताना शेतकरी हित केंद्रस्थानी ठेवावं अशी मागणी करत आहेत.