BT Cotton Seed : नफेखोरीसाठी बीटी कपाशी बियाण्यांचे बुकिंग

Nanded News : बीटी कपा बियाण्यांचा तुटवडा निर्माण करून ते जादा दराने विक्री करण्याच्या उद्देशाने ठोक बियाणे विक्रेत्यांनी किरकोळ बियाणे विक्रेत्यांना अंधारात ठेवून कपाशी बियाणे उत्पादक कंपन्यांकडे स्वत:च आगाऊ बुकिंग केले आहे.

यामुळे बाजारात मागणी असलेल्या बीटी कपाशी बियाण्यांचा कृत्रीम तुटवडा होण्याची शक्यता आहे. यामुळे प्रशासनाने यात लक्ष घालून बीटी बियाण्यांचे वितरण स्वत:कडे घ्यावे, अशी मागणी कृषी निविष्ठा विक्रेते धनराज मंत्री यांनी मुख्यमंत्री एकनाथ शिंदे यांच्याकडे केली आहे.

बाजारात कपाशीला चांगला दर मिळाल्याने आगामी खरीप हंगामात कपाशीच्या लागवड क्षेत्रात वाढ होण्याची शक्यता आहे. परिणामी काही नामांकीत कपाशी बियाणे उत्पादक कंपनीच्या बीटी वाणांना मागणी वाढण्याची शक्यता आहे. बियाणे, खते व कीडनाशक विक्रेत्यांच्या संघटनेने (माफदा) यापूर्वी कोणत्याही विक्रेत्यांनी बीटी कपाशी बियाण्यांचे आगाऊ बुकिंग करू नये, असे पत्र काढले होते.

परंतु माफदा संघटनेच्या पदाधिकाऱ्यांनी आंदोलनाच्या माध्यमातून बंद पुकारला. यानंतर अधिकाराचा गेरवापर करून किरकोळ बियाणे विक्रेत्यांना अंधारात ठेवत स्वत: मात्र बीटी बियाण्याचे आगाऊ बुकिंग केले.

यानंतर हेच ठोक कपाशी बियाणे विक्रेते बाजारात मागणी असलेल्या ठराविक बीटी कपाशी बियाण्यांची कृत्रीम टंचाई निर्माण करून जादा दराने बियाणे विक्री करण्याचा घाट घालण्याची शक्यता असल्याचे मुख्यमंत्री एकनाथ शिंदे, जिल्हाधिकारी अभिजीत राऊत यांना दिलेल्या निवेदनात म्हटले आहे.

बीटी कपाशी बियाण्यांचा काळाबाजार रोखण्यासाठी प्रशासनाने कपाशी बियाणे उत्पादक कंपन्यांकडून येणारे बियाणे थांबवून कृषी विभागाच्या ताब्यात द्यावे. प्रत्येक तालुक्यात लागवडीच्या सरासरीनुसार कृषी विभागाने किरकोळ बियाणे विक्रेत्यांच्या माध्यमातून शासकीय अधिकाऱ्यांच्या समक्ष बीटी कपाशी बियाण्यांचे शेतकऱ्यांना वितरण व्हावे, असे धनराज मंत्री यांनी निवेदनात म्हटले आहे.