Bhimthadi Jatra : भीमथडी जत्रा शुक्रवारपासून

Pune News : बहुप्रतीक्षित १८ व्या भीमथडी जत्रेस शुक्रवार (ता. २०)पासून सुरुवात होत आहे. ज्यामध्ये महाराष्ट्राच्या ग्रामीण कला, संस्कृती आणि टिकाऊ नवोन्मेषाचे प्रदर्शन होणार आहे. ही जत्रा बुधवार (ता. २५)पर्यंत पुण्यातील पुणे कृषी महाविद्यालयाच्या सिंचन नगर, पुणे येथे सकाळी १० ते रात्री १० वाजेपर्यंत सुरू राहणार आहे.

ही प्रतिष्ठित जत्रा ग्रामीण शिल्पकार, उ‌द्योजक आणि शहरी प्रेक्षकांना एकत्र आणत पारंपरिकता आणि आधुनिकतेचा उत्सव साजरा करेल, अशी माहिती भीमथडीच्या आयोजिका सुनंदा पवार यांनी शुक्रवारी (ता. १३) दिली.

भीमथडी जत्रा २०२४ किमान एक लाख पर्यटकांना आकर्षित करेल आणि हे ग्रामीण उद्योजकतेला प्रोत्साहन देण्याचे तसेच सांस्कृतिक आदान, प्रदानाचे एक महत्त्वाचे व्यासपीठ आहे. चालू वर्षी ३२५ स्टॉल राहणार असून ७० टक्के स्टॉल नवीन आहेत. या वर्षीच्या प्रमुख आकर्षणामध्ये शेतकऱ्यांच्या उत्पादनाचे विभाग, त्यामध्ये ‘रेसिड्यू-फ्री’ उत्पादने प्रमुख असतील.

यामुळे या उत्पादनांच्या आरोग्यदायी फाय‌द्यांची आणि टिकाऊपणाची माहिती ग्राहकांपर्यंत पोहोचवली जाईल. यामध्ये जीआय-प्रमाणित उत्पादने, ताजे शेतीमाल आणि मध यांचा समावेश असेल. या वर्षी एक नवीन मधमाश्‍या आणि फुलपाखरांच्या संरक्षणासाठी एक वनस्पती बाग देखील उभारली जाईल, जी कृषी आणि जैवविविधतेतील महत्त्वाच्या परागकण करणाऱ्या जिवांचे शिक्षण देईल.

भीमथडी सिलेक्ट विभागात ३० स्टॉल्स असतील, जे भारतातील १२ वेगवेगळ्या राज्यांमधून असतील. यामध्ये नैसर्गिक रंगांनी तयार केलेली वस्त्रे, पारंपरिक कातकिणी तंत्रा‌द्वारे तयार केलेली जीवनशैली उत्पादने यांचा समावेश असेल. तसेच तेलंगणामधील स्टॉल्स पहिल्यांदाच या वर्षी सहभागी होत आहे.

ज्यामुळे तेलंगणा प्रदेशाच्या पारंपरिक हातमाग आणि खा‌द्यपदार्थाची चव आणि अनुभव मिळवता येईल. बारा बलुतदार विभाग, जो महाराष्ट्रातील पारंपरिक व्यवसाय समुदाय असणार आहे. येथे चांभार, कुंभार, बांबू शिल्पकार अशा शिल्पकारांच्या कार्यशाळा होणार आहेत. ज्यामुळे ग्रामीण अर्थव्यवस्थेतील शिल्पकला व हस्तकला अधिक समजून घेता येईल, असेही सुनंदा पवार यांनी सांगितले.