Bahiram Yatra : बहिरम यात्रेस आजपासून प्रारंभ

Amravati News : संपूर्ण राज्यामध्ये दीर्घकाळ चालणारी बहिरम यात्रेचा २० डिसेंबरपासून प्रारंभ होणार आहे. त्या पार्श्‍वभूमीवर दुकानांसाठी लागणाऱ्या जागेचा लिलाव काही दिवसांपूर्वीच झाला. आता शुक्रवारी श्रीक्षेत्र बहिरम यात्रेचा नारळ फुटणार असून, प्रशासनाच्या वतीने भाविकांना व व्यावसायिकांना सोईसुविधा देण्याच्या दृष्टीने प्रयत्न सुरू आहेत.

मध्य प्रदेश व महाराष्ट्राच्या सीमेवर सातपुड्याच्या पायथ्याशी सव्वा महिना चालणारी ही यात्रा थंडीच्या काळात येत असल्यामुळे येथे हंडी मटण बनविले जाते. या भागातील नागरिकांचे कुलदैवत बहिरम बुवा मानला जात असून, आदिवासी बांधवांमध्ये देखील बहिरम बाबाला मानाने पुजले जाते. यामुळे या यात्रेमध्ये आदिवासी बांधवांची देखील मोठी गर्दी असते. शेतीला लागणारे साहित्य या यात्रेत मोठ्या प्रमाणात विकायला येत असल्याने शेतकरी वर्ग देखील यात्रेकडे आकर्षिला जात असतो.

या यात्रेमध्ये महाराष्ट्रच नव्हे तर मध्य प्रदेशातील अनेक भाविक भक्त दर्शन घेण्यासाठी येतात. शनिवार व रविवार या दोन दिवशी यात्रेमध्ये मोठ्या प्रमाणात भाविकांची गर्दी असते. यात्रेतील काही दुकाने लागण्यास आता सुरुवात झाली आहे. सुलभ शौचालयाची व्यवस्था दोन ठिकाणी करण्यात आली, तर कारंजा रोडवरील जागेवर राहुट्याधारक राहुट्या उभारण्यात मग्न झालेले दिसून येत आहेत. येत्या दोन-तीन दिवसांत विविध साहित्यांची दुकाने, हॉटेल, आकाश पाळणे आदी मोठ्या प्रमाणात दिसून येणार आहेत.