Bacchu Kadu Disqualified: जिल्हा बॅंक अध्यक्षपदावरून बच्चू कडू अपात्र

Amravati News: शासकीय कामात अडथळा आणि मारहाणप्रकरणी नाशिक विशेष न्यायालयाने एक वर्षाची शिक्षा ठोठावल्याचा हवाला देत माजी राज्यमंत्री बच्चू कडू यांना जिल्हा बॅंकेच्या अध्यक्षपदावरून अपात्र ठरविण्यात आले आहे. श्री. कडू यांनी शेतकरी कर्जमाफी संदर्भातील आंदोलन स्थगित केल्यानंतर तत्काळ या संबंधीचे आदेश देण्यात आल्याने हा प्रकार विरोधकांची मुस्कटदाबी करण्यासारखा आहे, असा आरोप केला जात आहे.

विधानसभा निवडणुकीत पराभूत होण्यापूर्वीच बच्चू कडू हे जिल्हा बॅंकेचे अध्यक्ष होते. विरोधी गटातील दोन संचालकांना फोडून त्यांनी हे पद मिळविल्याचा आरोप त्यावेळी करण्यात आला होता. त्यानंतर सातत्याने विरोधी गटातील सदस्यांकडून त्यांच्याविरोधात आर्थिक अनियमिततेचे आरोप जिल्हा निबंधकांकडे (सहकारी संस्था) लेखी स्वरूपात करण्यात आले होते. त्याची दखल घेत सातत्याने त्यांची चौकशी झाली.

परंतु बॅंक प्रशासनाला निबंधक किंवा विभागीय सहनिबंधक यांच्याकडून प्राप्त नोटीस, पत्र न स्वीकारण्याच्या सूचना देण्यात आल्या होत्या. त्यामुळेच अनेक प्रकारच्या चौकशा प्रलंबित असल्याचा आरोप विरोधी गटातील संचालकांकडून केला जात आहे. अशातच नाशिक येथील एका प्रकरणात बच्चू कडू यांच्यावर सकरवाडा पोलिसांत गुन्हा दाखल करण्यात आला होता.

शासकीय कामात अडथळा आणण्याबरोबरच त्यांच्यावर मारहाण केल्याची त्यांच्याविरोधात तक्रार होती. या प्रकरणी नाशिक येथील विशेष (आमदार-खासदार) न्यायालयाने त्यांना एक वर्षाच्या कठोर कारावासाची शिक्षा सुनावली होती. या निर्णयाविरोधात बच्चू कडू यांनी मुंबई

उच्च न्यायालयाच्या नागपूर खंडपीठात

याचिका दाखल केली आहे. असे असतानाच विभागीय सहनिबंधक यांनी त्यांच्या अधिकारानुसार बच्चू कडू यांना बॅंकेच्या अध्यक्षपदासह संचालक पदावरून अपात्र ठरविले आहे. ही जागा रिक्‍त ठरवून त्यांना पुढील पाच वर्षांच्या मुदतीचा कालावधी संपेपर्यंत समिती सदस्य, संचालक म्हणून पुन्हा नामनिर्दिष्ट होण्यास देखील अपात्र ठरविण्यात आले आहे.