Pune News: ‘‘शेतकरी विदेश अभ्यास दौऱ्यासाठी तुमची निवड झाली आहे. आमच्याकडे पैसे भरा,’’ अशी भूलथाप देत पैसे उकळण्याचे प्रयत्न राज्याच्या काही भागांत चालू आहेत. त्यामुळे जिल्हा अधीक्षक कृषी अधिकारी (एसएओ) कार्यालयाने कळविल्याशिवाय कोणालाही पैसे देऊ नका, असे आवाहन कृषी आयुक्तालयाने केले आहे.
विदेशातील आधुनिक शेती व कृषी तंत्रज्ञान कळावे म्हणून कृषी विभागामार्फत शेतकऱ्यांचे विदेश अभ्यासदौरे आयोजित केले जातात. राज्य शासनाकडून या योजनेसाठी यंदा एका शेतकऱ्याला एक लाख रुपयापर्यंत अनुदान मिळणार आहे. त्यामुळे या योजनेविषयी राज्यभर उत्सुकता आहे. गेल्या वर्षी कृषी विभागाने गाजावाजा करूनही अभ्यास दौरा काढला नव्हता.
यंदा दौऱ्याचे कंत्राट निश्‍तित करण्यासाठी अलीकडेच निविदा काढल्या गेल्या. परंतु दौऱ्याचे पुढील नियोजन, खर्च व इतर अटीशर्ती अद्याप निश्‍चित केलेल्या नाहीत. या घडामोडींचा फायदा घेत काही व्यक्तींकडून दौऱ्याच्या नावाखाली परस्पर पैसे गोळा करण्याचे प्रयत्न चालू आहेत. त्यासाठी समूह माध्यमाचा वापर होत असून यातून सामान्य शेतकऱ्याची फसवणूक होऊ शकते, असे कृषी विभागाला वाटते.
कृषी विभागाच्या म्हणण्यानुसार, विदेश दौऱ्यासाठी अद्याप शेतकरीच निश्‍चित करण्यात आलेले नाहीत. त्यामुळे निवड यादी ठरण्यापूर्वी शेतकऱ्यांकडून पैसे गोळा करण्याचा प्रश्नच उद्भवत नाही. मुळात, दौऱ्यासाठी इच्छुक असलेल्या शेतकऱ्याकडून तालुका कृषी अधिकारी आधी अर्ज मागविणार आहेत. संबंधित जिल्ह्यासाठी किती शेतकऱ्यांचे उद्दिष्ट आहे हे तपासून गोळा झालेल्या अर्जांमधून सोडत काढली जाणार आहे. जिल्हा अधीक्षक कृषी अधिकारी त्यानंतर निवड संबंधित शेतकऱ्याची कळविणार आहेत. त्यानंतर पुढचा टप्पा पैसे भरण्याचा आहे.
दौऱ्याचा एकूण खर्च निश्‍चित झाल्यानंतर अनुदानाची एक लाखापर्यंत रक्कम वजा करून उर्वरित शुल्क शेतकऱ्याने ‘दौरा खर्च’ म्हणून भरणा करायचे आहे. मात्र ही रक्कम नेमकी किती व कोणाकडे कशी भरायची हे अजून निश्‍चित करण्यात आलेले नाही. त्यामुळे शेतकऱ्यांनी सध्या कोणत्याही व्यक्तीला, संस्थेला किंवा प्रवासी कंपनीला एक रुपयादेखील देऊ नये, असे कृषी विभागाचे म्हणणे आहे.
‘‘शेतकरी विदेश दौऱ्याबाबत दिशाभूल करणारी माहिती देणे, पैसे भरण्यासाठी आवाहन करणे, असे गैरप्रकार समूह माध्यमातून घडत आहेत. मात्र शेतकऱ्यांनी सावध व्हावे व अफवांना बळी पडू नये. अधिकृत माहिती हवी असल्यास केवळ तालुका कृषी अधिकारी किंवा जिल्हा अधीक्षक कृषी अधिकारी कार्यालयाशी संपर्क साधावा,’’ असे आवाहन कृषी आयुक्तालयाने केले आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.