Sant Dnyaneshwar Maharaj Palkhi: माऊलींच्या पालखीचे धर्मपुरीत आगमन

Solapur News:

देव गुज सांगे पंढरीसी यारे।

प्रेमें चित्तीं घ्यारे नाम माझें।।

कायावाचामनें दृढ धरा जीवीं।

सर्व मी चालवी भार त्यांचा।।

असे वारकरी प्रेमांचे आर्त प्रगट करणारे दिंड्यामधून गायले जाणारे अभंग...डौलाने फडकणाऱ्या पताका... रथाला डोळ्यांचे पारणे फेडणारी केलेली आकर्षक फुलांची सजावट... माऊली, माऊली नामांचा अखंड जयघोष करत श्री संत शिरोमणी ज्ञानोबारांयांच्या पालखी सोहळ्याने लाखो वैष्णवांसह सोमवारी (ता. ३०) सोलापूर जिल्ह्यांत धर्मपुरी येथे प्रवेश केला.

पालकमंत्री जयकुमार गोरे, सौ. गोरे, खासदार धैर्यशील मोहिते पाटील, आमदार उत्तमराव जानकर, रणजितसिंह मोहिते पाटील, माजी आमदार राम सातपुते, ॲड. रामहरी रूपनवर, जिल्हाधिकारी कुमार आशीर्वाद, जिल्हा पोलिस प्रमुख अतुल कुलकर्णी, मुख्य कार्यकारी अधिकारी दीपक जंगम,

अतिरिक्त जिल्हा पोलिस प्रमुख प्रीतम यावलकर, अप्पर जिल्हाधिकारी मोनिका सिंग ठाकूर, उपमुख्य कार्यकारी अधिकारी स्मिता पाटील, महिला व बालकल्याण अधिकारी प्रसाद मिरकले, प्रांताधिकारी विजया पांगारकर, तहसीलदार सुरेश शेजूळ उपस्थित होते.

सकाळपासून हजारो वारकरी जिल्ह्यांत प्रवेश करीत होते. सकाळी ९.३० माऊलींच्या नगाऱ्यांचे पाठोपाठ माऊलींच्या व स्वारांच्या अश्वांचे आगमन झाले. या वेळी फटाक्यांची आतषबाजी करण्यात आली. दिंड्या पाठोपाठ १० वाजता माऊलींच्या रथांचे आगमन झाले. या वेळी उपस्थित मान्यवरांनी माऊलींचे पूजन करून स्वागत केले.

या वेळी मालखी सोहळ्यांचे मालक बाळासाहेब आरफळकर, विश्वस्त, चोपदार राजाभाऊ, रामभाऊ, बाळासाहेब यांचा सन्मान करण्यात आला. या वेळी सातारा जिल्हा समारोपास जिल्हाधिकारी व विविध खात्यांचे अधिकारी उपस्थित होते.