PDKV Akola : ‘पंदेकृवि’ला तीन नव्या प्रकल्पांना मान्यता

Akola News : येथील डॉ. पंजाबराव देशमुख कृषी विद्यापीठात आगामी काळात वेगवेगळे तीन प्रकल्प राबवण्यास मान्यता देण्यात आली असून, यासाठी सुमारे ११ कोटींपेक्षा अधिक निधी उपलब्ध करून दिला जाणार आहे. संशोधनाच्या दृष्टीने हे प्रकल्प महत्त्वाचे मानले जातात.

कृषी विद्यापीठात राष्ट्रीय कृषी विकास योजनेअंतर्गत ‘सुधारित फळ पिकांतर्गत मोठ्या प्रात्यक्षिक आणि व्यावसायिक शेतीचा विकास’ हा प्रकल्प राबविण्यास प्रशासकीय मान्यता शासनाने दिली आहे.

मुख्य सचिवांच्या अध्यक्षतेखाली राष्ट्रीय कृषी विकास योजनेच्या ३४ व्या राज्यस्तरीय प्रकल्प मंजुरी समितीच्या बैठकीत प्रकल्प ‘पंदेकृवि’मध्ये २०२४-२५ आणि २०२५-२६ या दोन वर्षांसाठी प्रकल्पात मान्यता देण्यात आली. यासाठी सात कोटी ४७ लाख रुपये मंजूर करण्यात आले.

अत्याधुनिक बियाणे तपासणी लॅब

उपरोक्त समितीच्या बैठकीत विद्यापीठाला राष्ट्रीय कृषी विकास योजनेअंतर्गत अत्याधुनिक बियाणे तपासणी प्रयोगशाळेसाठी मान्यता देण्यात आली. दोन कोटी ४ लाख रुपये यासाठी मंजूर झाले आहेत. यातून Establishment of advanced seed testing by strenghthning of notified seed testing leboratory उभारली जाईल.

तृणधान्य उत्पादन, उत्पादकता वाढविण्यासाठी बियाणे उत्पादन प्रकल्प

आंतरराष्ट्रीय भरडधान्य वर्षानिमित्त सध्या तृणधान्यांचा बोलबाला सुरू आहे. पोषणमूल्यांमुळे या धान्यांची मागणीही समाजात वाढते आहे. आजवर दुर्लक्षित असलेल्या या धान्यांचा वापर वाढत असल्याची चांगली बाब लक्षात घेता आता या तृणधान्यांचे बियाणे उत्पादन वाढीसाठी खास प्रकल्प पंदेकृविमध्ये राबवला जाणार आहे.

या प्रकल्पासाठी शासनाने दोन कोटी चार लाख रुपये प्रशासकीय मान्यता दिली आहे. या निधीतून तृणधान्य बियाणे वाढीसाठी खास प्रयत्न होणार आहेत. त्यामुळे येत्या काळात तृणधान्यांचे बियाणे मोठ्या प्रमाणात उपलब्ध होण्यास हातभार लागू शकेल. हा प्रकल्प विद्यापीठाच्या संशोधन संचालकांच्या अखत्यारीत राबवला जाईल.