Irrigation Scheme : बेलकुंड उपसा सिंचन योजनेच्या सर्वेक्षणाला मंजुरी

Latur News : माकणी (ता. लोहारा) येथील निम्न तेरणा प्रकल्प तसेच तेरणा नदीवरील बॅरेजेसमुळे धाराशिव व लातूर जिल्ह्यांतील अनेक गावे सिंचनाखाली आले आहेत. मात्र प्रकल्पापासून आठ ते दहा किलोमीटर अंतरावरील बेलकुंड व परिसरातील गावांना प्रकल्पातील पाण्याचा काहीच फायदा होत नव्हता.

यामुळे प्रकल्पातून बेलकुंड उपसा जलसिंचन योजनेसाठी उपमुख्यमंत्री देवेंद्र फडणवीस यांच्याकडे पाठपुरावा केला होता. त्याला यश आले असून, योजनेच्या सर्वेक्षण व अन्वेषण कामाला जलसंपदा विभागाने मंजुरी दिल्याची माहिती औशाचे आमदार अभिमन्यू पवार यांनी दिली.

सर्वेक्षणानंतर तातडीने अंदाजपत्रक तयार करून अंतिम मंजुरी मिळवून योजना लवकरात लवकर प्रत्यक्षात कार्यान्वित केली जाणार असल्याचे आमदार पवार यांनी सांगितले. निम्न तेरणा प्रकल्पाच्या वरील भागातील बेलकुंड, कवळी, हिप्परगा, वांगजी, देवताळा, तावशी ताड, माळकोंडजी, माळुंब्रा, तुंगी, मसलगा( खु.), संक्राळ, हसलगण, चिंचोली काजळे, नांदुर्गा, टाका, सिंदाळा व गुळखेडा आदी १६ ते १७ गावांना धरण उशाला असूनही सिंचनासाठी पाणी उपलब्ध होत नव्हते.

यामुळेच या गावांसाठी स्वतंत्र उपसा जलसिंचन योजना मंजूर करावी, अशी मागणी आमदार पवार यांनी केली होती. मागणीनंतर काही महिन्यांपासून ते शासनदरबारी सातत्याने पाठपुरावा करत होते. त्याला यश आले असून प्रकल्पातून योजनेच्या सर्वेक्षण व अन्वेषण कामास मंजुरी मिळाल्याचे आमदार पवार यांनी सांगितले.

योजनेच्या मंजुरीने प्रकल्पाच्या कालव्याद्वारे उमरगा, निलंगा व औसा तालुक्यांतील ११ हजार ६१० हेक्टर सिंचन क्षेत्र तसेच आशिव उपसा सिंचन योजनेवरील ६ हजार ८९० हेक्टर सिंचन क्षेत्र व पाणीसाठा कायम ठेवण्यात आला असून, मंजूर प्रकल्पीय सिंचनात कोणतीही कपात प्रस्तावित नसल्याचे आमदार पवार यांनी स्पष्ट केले.

तेरणा नदीवरील नऊ बॅरेजेसच्या लाभक्षेत्रातील पाणीवापरात होणारी बचत विचारात घेऊन बेलकुंड उपसा जलसिंचन योजनेचे नियोजन करण्यात आले आहे. निम्न तेरणा प्रकल्पाच्या फेरनियोजनामुळे कायम सिंचानापासून वंचित असलेल्या बेलकुंड व परिसरातील गावच्या शिवारात तीन ते साडेतीन हजार क्षेत्र सिंचनाखाली येणार असल्याचे आमदार पवार यांनी सांगितले.