Zero Tillage Farming : अमेरिकेतील कृषी शास्त्रज्ञांनी केली भोर येथील शेतीची पाहणी

Pune News : तालुक्यातील संगमनेर येथील यादव बंधूनी केलेल्या शून्य मशागत शेतीला अमेरिकेतील सुप्रसिद्ध कॉर्नेल युनिव्हर्सिटीतील शास्त्रज्ञ डॉ. के. व्ही. रमण यांनी शनिवारी (ता.२) भेट देऊन पाहणी केली. या वेळी ‘एसआरटी’चे शेखर भडसावळे उपस्थित होते.

जमिनीचा वाढलेला सेंद्रिय कर्ब, कार्बनचे जमिनीत स्थिरीकरण तसेच भुईमूग प्रजननामधून नवीन अधिक उत्पादन देणाऱ्या भुईमूग वाणाची निर्मिती या विशेष प्रकल्पांची त्यांनी पाहणी केली.

एसआरटी शेती पद्धतीमध्ये उत्पादन खर्चात कपात होते, उत्पादनात वाढ होते, जमिनीची जैव विविधता वाढते, गांडुळांची संख्या वाढते, आणि जमिनीचा सेंद्रिय कर्ब वाढतो तसेच कार्बनचे जमिनीमध्ये स्थिरीकरण होते या सर्व गोष्टींची त्यांनी प्रत्यक्ष पाहणी केली.

अंकुर, किरण व सुरज या यादव बंधूंसारखी तरुण मुले शेतीत येऊन संशोधक काम करत आहेत, कृषी पर्यटनामधून उत्पादनाची नवीन गणिते मांडत आहेत. तसेच वेळवंडी फेडरेशन शेतकरी उत्पादक कंपनीच्या माध्यमातून शेतकऱ्यांना संघटित करून शेतीमालाचे मूल्यवर्धन करीत आहेत, याचे डॉ. रमण यांनी कौतुक केले.

या प्रसंगी तालुका तंत्र व्यवस्थापक लक्ष्मीकांत कणसे, कृषी पर्यवेक्षक डी. के. कवितके तसेच शेतकरी अंकुर यादव, किरण यादव, सूरज यादव तसेच परिसरातील शेतकरी उपस्थित होते.