Manikrao Kokate : कृषिमंत्री माणिकराव कोकाटेंचा राजीनामा तूर्तास टळला?

Ajit Pawar : कृषिमंत्री माणिकराव कोकाटे यांचा राजीनामा तूर्तास टळल्याची माहिती समोर आली आहे. त्यामुळे कोकाटे यांना मोठा दिलासा मिळाल्याचं बोललं जात आहे. वारंवार वादग्रस्त विधान आणि विधिमंडळात ऑनलाईन रमी खेळण्याच्या प्रकारामुळे कृषिमंत्री कोकाटे यांच्या मंत्रिपदाचा राजीनामा घेण्याची मागणी विरोधकांकडून केली जात आहे. परंतु त्यावर उपमुख्यमंत्री अजित पवारांनी मंगळवारी (ता.२९) कोकाटे यांच्याशी चर्चा करून निर्णय घेण्याचं जाहीर केलं. त्यामुळे मंगळवारी मंत्रिमंडळ बैठकीच्या पूर्वी कोकाटे यांचा राजीनामा घेतला जाईल, अशी राजकीय वर्तुळात चर्चा रंगली होती.

परंतु मंत्रिमंडळ बैठकीच्या आधी मंत्रालयात उपमुख्यमंत्री अजित पवार आणि कृषिमंत्र्यांची बैठक झाली. या बैठकीत अजित पवारांनी कृषिमंत्र्यांचे चांगलेच कान टोचले असून कृषिमंत्र्यांनी दिलगिरी व्यक्त केल्याची चर्चा आहे. त्यामुळे तूर्तास तरी कृषिमंत्र्यांच्या राजिनाम्यावर पडदा पडल्याचं दिसतंय.

मंत्रिमंडळ बैठकीपूर्वी उपमुख्यमंत्री अजित पवार आणि कृषिमंत्री कोकाटे यांच्यात दीड तास बैठक झाली. परंतु या बैठकीनंतर माध्यमांना काहीही माहिती न देता कोकाटे बैठकीला निघून गेले. त्यामुळे कोकाटे यांचा राजीनामा तूर्तास घेणं, उपमुख्यमंत्री पवारांनी टाळल्याचं सांगितलं जात आहे.

याच बैठकीत कृषिमंत्र्यांनी दिलगिरी व्यक्त करून भविष्यात अशी वक्तव्ये करणार नाही, अशी हमी उपमुख्यमंत्री अजित पवारांना दिली आहे. त्यामुळे राज्याच्या कृषिमंत्री पदावर कोकाटे कायम राहतील, अशी संकेत मिळत आहेत.

एक रुपया भिकारी घेत नाही, 'कृषी खातं म्हणजे ओसाड गावाची पाटीलकी, शेतकरी कर्जमाफीच्या पैशात मोठी लग्न करतात, ढेकळाचे पंचनामे करायचे का, या वादग्रस्त विधानांमुळे कृषिमंत्री कोकाटे चर्चेत राहिले आहेत. परंतु कोकाटे यांच्या वादग्रस्त विधानांमुळे महायुती सरकारला टीकाचे धनी व्हावे लागले आहे.

त्यातच पावसाळी अधिवेशनात विधीमंडळात ऑनलाईन रमी खेळत असतानाचा कृषिमंत्र्यांचा व्हिडीओ समोर आल्याने विरोधकांनी सरकारवर जोरदार हल्लाबोल केला. तर शेतकऱ्यांमध्ये कृषिमंत्र्यांच्या वादग्रस्त विधानांमुळे संतापाची भावना निर्माण झाल्याचं पाहायला मिळालं. तर या प्रकरणावरून मुख्यमंत्री देवेंद्र फडणवीस आणि उपमुख्यमंत्री अजित पवारांनी नाराजी व्यक्त केल्याने कृषिमंत्री कोकाटे यांचा राजीनामा घेतला जाईल, या चर्चेला उधाण आलं.

दरम्यान, पावसाळी अधिवेशनानंतर मंत्रिमंडळाची पहिलीच बैठकी मंगळवारी होत आहे. त्यामुळे या बैठकीत कृषिमंत्र्यांच्या वादग्रस्त विधानांवरून चर्चा होण्याची शक्यता वर्तवली जात आहे.