Orchard Cultivation : ‘मनरेगा’अंतर्गत फळबाग लागवडीत कृषी विभाग अव्वल

Buldhana News : महात्मा गांधी रोजगार हमी योजनेअंतर्गत फळबाग लागवडीत कृषी विभाग अव्वल ठरला असून महाराष्ट्रदिनी बुधवारी (ता.१) शासकीय कार्यक्रमात कृषी विभागातील कर्तबगार अधिकाऱ्यांना गौरविण्यात आले. जिल्ह्यात सन २०२३-२४ वर्षात महात्मा गांधी रोजगार हमी योजनेअंतर्गत १४८५ हेक्टर आणि भाऊसाहेब फुंडकर फळबाग लागवड योजनेत १०३५ हेक्टर क्षेत्रावर फळबाग लागवड झाली आहे.

संग्रामपूर या आदिवासी बहुल तालुक्यात फळबाग लागवड सर्वाधिक झाली. या तालुक्याला प्रथम क्रमांक मिळाला. संग्रामपूर तालुका कृषी अधिकारी अमोल बनसोडे यांच्या नियोजनातून सन २०२३-२४ या आर्थिक वर्षात महात्मा गांधी रोजगार हमी योजनेअंतर्गत तालुक्यात लाभार्थ्यांनी ४५७ हेक्टर क्षेत्रावर फळबाग लागवड केली.

यामध्ये केळी व संत्रा या पिकांचा समावेश आहे. जिल्ह्यात फळबाग लागवडीत संग्रामपूर तालुक्याला प्रथम क्रमांक संपादन केल्यामुळे जिल्हाधिकारी डॉ. किरण पाटील यांच्या हस्ते बुधवारी तालुका कृषी अधिकारी श्री. अमोल बनसोडे, संग्रामपूर तालुक्यातील कृषी सहायक रवींद्र बाळासाहेब जाधव (वरवट बकाल येथे संत्रा व केळी पिकांची ५२ हेक्टर क्षेत्रावर लागवड),

सोनाळा कृषी सहायक वासुदेव भगवान भोई यांनी गावात ४० हेक्टर क्षेत्रावर फळबाग लागवड उद्दिष्ट पूर्ण करून द्वितीय क्रमांक तसेच मेहकर कृषी कार्यालयातील कृषी सहायक शंकर सदाशिव वाघमारे यांनी तारशिव, थार व खुदनापूर या गावात संत्रा या पिकाची ३६.६० हेक्टर क्षेत्रावर फळबाग लागवड उद्दिष्ट पूर्ण केले.

अशी झाली लागवड

महात्मा गांधी रोजगार हमी योजना १४८५ हेक्टर

भाऊसाहेब फुंडकर फळबाग लागवड योजना १०३५ हेक्टर

एकूण लागवड २५२० हेक्टर

शेतकऱ्यांनी फळबाग योजनेसाठी पुढे यावे : ढगे

पारंपरिक पिकांपेक्षा अधिक उत्पादन मिळवून देण्यासाठी फळबागा उपयोगी आहेत. हे लक्षात घेत जिल्ह्यात महात्मा गांधी रोजगार हमी योजनेअंतर्गत फळबाग लागवड तसेच भाऊसाहेब फुंडकर फळबाग लागवड योजनेअंतर्गत फळबाग लागवडीला प्रोत्साहन दिले जात आहे, असे जिल्हा अधीक्षक कृषी अधिकारी मनोजकुमार ढगे म्हणाले.