International Agri Hackathon India: ‘अॅग्री हॅकॅथॉन’च्या संकेतस्थळाचे अनावरण

Pune News: देशातील पहिली आंतरराष्ट्रीय ॲग्री हॅकॅथॉन जूनमध्ये पुण्यात आयोजित करण्यात येणार आहे. राज्याचे उपमुख्यमंत्री अजित पवार यांच्या हस्ते हॅकॅथॉनच्या संकेतस्थळाचे अनावरण नुकतेच करण्यात आले. ही स्पर्धा जिल्हा प्रशासन, कृषी विभाग, कृषी महाविद्यालय पुणे व आत्मा यंत्रणा यांच्या संयुक्त विद्यमाने आयोजित करण्यात येत आहे.

स्पर्धकांना https://www. puneagrihackathon.com या संकेतस्थळावर ५ मेपर्यंत अर्ज करता येतील. आलेल्या अर्जांची पडताळणी करून स्पर्धकांची यादी १५ मेपर्यंत अंतिम करण्यात येईल. जून महिन्याच्या पहिल्या सप्ताहात ॲग्री हॅकॅथॉन स्पर्धा आयोजित करण्याचे नियोजित आहे, अशी माहिती जिल्हाधिकारी जितेंद्र डुडी यांनी दिली.

कृषी क्षेत्रातील विविध समस्यांचे आठ प्रकारांत वर्गीकरण करण्यात आले असून, त्यावर स्पर्धकांनी उपाययोजना (सोल्यूशन) शोधायचे आहे. सर्वोत्तम सोल्यूशन सादर करणाऱ्या स्पर्धकांची प्रत्येक गटामध्ये प्रथम व द्वितीय पारितोषिकासाठी तज्ज्ञ समितीमार्फत निवड करण्यात येणार आहे.

प्रथम विजेत्यास २५ लाख रुपये व द्वितीय विजेत्यास १५ लाख रुपये पारितोषिक म्हणून दिले जातील. स्पर्धकांकडून आलेल्या उपाययोजना व सोल्यूशन शेतकऱ्यांपर्यंत पोहोचण्यासाठी त्याचे उत्पादन व विपणन प्रोत्साहन म्हणून हे पारितोषिक देण्यात येणार आहे.

शेतकऱ्यांना होणार लाभ

अॅग्री हॅकॅथॉन ही एक अभिनव संकल्पना असून, त्याद्वारे शेतीतील काढणीपश्चात होणारे नुकसान, खतांचा काटेकोर वापर, पाण्याचा कार्यक्षम वापर, कृत्रिम बुद्धिमत्ता (एआय), इंटरनेट ऑफ थिंग्ज (आयओटी) आदी अत्याधुनिक तंत्रज्ञानांच्या वापराद्वारे अनेक समस्यांवर उपाययोजना शोधून त्या शेतकऱ्यांपर्यंत पोहोचविण्यामध्ये मदत होणार आहे, असे जिल्हाधिकारी डुडी यांनी सांगितले.