Karnataka Accident : मका प्रक्रिया कारखान्यात मोठी दुर्घटना, गोण्या पडल्याने ६ जणांचा मृत्यू

Vijapur maize processing unit tragedy : कर्नाटकातील एक मोठी दुर्घटना घडली आहे. विजयपुरा येथील मका प्रक्रिया कारखान्यातील अनेक मजूरांवर पोत्यांचा ढीग पडल्याने ६ मजूरांचा मृत्यू झाला. इतर जखमींचे प्राण वाचविण्यासाठी बचाव कार्य सुरू आहे.

विजयपुरामधील औद्योगिक परिसरातील राजगुरू फूड्सच्या गोदामात ही घटना घडली. मका प्रक्रिया प्रकल्पाच्या ढिगाऱ्यात अनेक मजूर अडकल्याचे समजते. १० हून अधिक मजूर आत अडकल्याची भीती व्यक्त करण्यात येत आहे. प्रशासनाच्यावतीने तातडीने बचाव कार्य सुरू करण्यात आले. त्यामध्ये ढिगाऱ्याखालून आतापर्यंत ६ मजुरांचे मृतदेह बाहेर काढण्यात आले आहेत. राजेश कुमार (२५), मुखिया (२६) आणि रामजी मुखिया (२९), राम बालक (५२) सर्व रा. बिहार आणि लुको जाधव (४५) अशी मृतांची नावे आहेत.

मक्याच्या गोण्यांच्या ओव्हरलोडमुळे दुपारी साडेचार वाजता साठवण टाकी कोसळून ही घटना घडल्याची प्राथमिक माहिती आहे. वेअरहाऊसमध्ये चार स्टोरेज पॉइंट आहेत, प्रत्येकाची क्षमता १२० टन आहे.

विजयपुराचे जिल्हाधिकारी आणि पोलिस अधीक्षक (एसपी) यांनी घटनास्थळी भेट दिली. तीन कामगारांना आधीच वाचवण्यात आले असून जखमींना रुग्णालयात दाखल करण्यात आले आहे. बचावकार्य सुरू आहे. एसडीआरएफ आणि अग्निशमन विभागाच्या जवानांनी रात्रभर बचावकार्य केले आणि जेसीबीचा वापर करून ४ मजूरांची सुटका केली. दुर्घटनेनंतर फूड प्रोसेसिंग युनिटचा मालक फरार झाला असून त्याला पकडण्यासाठी पोलीस अधिकाऱ्यांनी शोधमोहीम सुरू केली आहे.