Agriculture Update : आव्हाने स्वीकारणे शास्त्रज्ञाचे काम : डॉ. मणी

Chhatrapati Sambhajinagar : जो शेतकऱ्यांच्या बांधावर जाऊन आपल्या संशोधनाची दिशा ठरवणार नाही तो कृषी शास्त्रज्ञ कसा म्हणावा. हवामान बदलाच्या या काळात शेतकऱ्याला जमीन, पीक, उत्पादकता वाढ या सर्व विषयांवर समाधान हवंय. तो तज्ज्ञ म्हणून आपल्याकडे पाहतोय. आव्हाने स्वीकारणे हे शास्त्रज्ञाचे काम. त्यामुळे कृषीत येणाऱ्या आव्हानाची उत्तर द्यावे लागतीलच असे परखड मत वसंतराव नाईक मराठवाडा कृषी विद्यापीठाचे कुलगुरू डॉ. इंद्र मणी यांनी व्यक्त केले.

विभागीय कृषी विस्तार आणि सल्लागार समितीची ७५ वी बैठक शुक्रवारी (ता. १४) राष्ट्रीय कृषी संशोधन प्रकल्प पैठण रोड छत्रपती संभाजीनगर येथे पार पडली. या बैठकीच्या उद्‌घाटन सत्रात अध्यक्षस्थानावरून कुलगुरू डॉ. मणी बोलत होते.

या बैठकीसाठी अध्यक्ष म्हणून वसंतराव नाईक मराठवाडा कृषी विद्यापीठाचे संशोधन संचालक डॉ. खिजर बेग, संचालक विस्तार शिक्षण डॉ. धर्मराज गोखले, महाराष्ट्र कृषी शिक्षण व संशोधन परिषदेचे संचालक संशोधन डॉ. हरिहर कौसडीकर, छत्रपती संभाजीनगरचे विभागीय कृषी सहसंचालक डॉ. तुकाराम मोटे, राष्ट्रीय कृषी संशोधन प्रकल्पाचे प्रमुख डॉ. एस. बी. पवार यांची प्रामुख्याने उपस्थिती होती.बैठकीला विद्यापीठातील कृषी महाविद्यालयाचे प्राचार्य, विभाग प्रमुख, कृषी संशोधन केंद्राचे प्रमुख, जिल्हा अधीक्षक कृषी अधिकारी, कृषी विज्ञान केंद्राचे कार्यक्रम समन्वयक, विस्तार कृषी विद्यावेत्ता उपस्थित होते.

कृषी संलग्न विभागाची दांडी

या वेळी झालेल्या ७५ व्या कृषी संशोधन सल्लागार समितीच्या बैठकीला उपस्थिती अपेक्षित असलेल्या सामाजिक वनीकरण, मत्स्य व्यवसाय, पशुसंवर्धन आणि सिंचन या कृषी निगडित महत्त्वाच्या विभागाची अनुपस्थिती राहिली. नियोजनानुसार मध्य महाराष्ट्र पठार विभागात मराठवाड्यातील आठ जिल्ह्यांसह धुळे बुलडाणा व जळगाव हे तीनही जिल्हे येतात. या विभागासाठी या बैठकीचे आयोजन असते. मात्र या तिन्ही जिल्ह्यांतील कोणताही विभाग बैठकीसाठी उपस्थित नव्हता हे विशेष.