Agrowon Sanvad : शेतकऱ्यांनी पेरणीची घाई करू नये

Jalna News : शेतकऱ्यांनी पेरणीची घाई करू नये. १०० मिलिमीटरपर्यंत पाऊस झाल्यासच पेरणी करावी. जमिनीत योग्य प्रमाणात ओल आल्यावरच पेरणी करावी. पेरणीपूर्वी खोल नांगरट करावी, पिकांचे वाण निवडताना आपली जमीन व हवामानानुसारच निवडावे. एकाच वाणाच्या मागे पडू नये, असे प्रतिपादन कृषी विज्ञान केंद्र बदनापूरचे शास्त्रज्ञ डॉ. दीपक कच्छवे यांनी मच्छिंद्र चिंचोली (ता. घनसावंगी) येथील ॲग्रोवन संवाद कार्यक्रमात सोमवारी (ता. २७) केले.

डॉ. कच्छवे म्हणाले, की कपाशी लागवड करताना कोरडवाहू जमिनीत चार फूट बाय दोन फुटावर लागवड करावी. बागायती जमिनीसाठी पाच बाय एक वर लागवड करावी. दादा लाड तंत्रज्ञानाप्रमाणे जर लागवड करायची असेल तर तीन बाय एक फुटावर लागवड करावी. झाड ३० ते ३५ दिवसाचे झाल्यावर गळ फांद्या काढून टाकाव्यात. तसेच ५५ दिवसानंतर झाडाचा शेंडा कापावा, त्यामुळे उत्पादनात वाढ होते. पेरणीपूर्वी बीज प्रक्रिया करणे आवश्यक आहे. बीज प्रक्रियेमुळे उत्पादनात १५ ते २० टक्के वाढ होते. तसेच कीड व रोगांचे नियंत्रण होते.

रीवुलीस इरिगेशन इंडिया लिमिटेडचे वरिष्ठ कृषी सल्लागार शिवराज लोणारे यांनी ठिबक सिंचनाच्या कार्यक्षम पद्धतीने कसा वापर करावा यावर मार्गदर्शन केले. ठिबकचा वापर केल्यामुळे जमीन कायम वापसा स्थितीत राहते. त्यामुळे पिकांची अन्नद्रव्य शोषणाची क्षमता वाढते व उत्पादन जास्त येते.

ठिबकचा वापर करताना गरजेनुसारच पाणी द्यावे. तरच ठिबकचा फायदा होतो व ठिबक योग्य दाबाने चालवावे व जमिनीचे सर्वेक्षण करूनच ठिबक बसवावे. तालुका कृषी अधिकारी एस. एन. पवळ म्हणाले, की शेतकऱ्यांनी तुटवडा असलेल्या वाणाच्या पाठीमागे लागू नये. एमआरपी पेक्षा जास्त किमतीने कोणी बियाणे विकत असतील तर त्याच्यावर शासन कारवाई करेल. कार्यक्रमाचे प्रास्ताविक अजित वाणी यांनी केले.

तर आभार प्रदर्शन चेतन सोनवणे यांनी केले. कार्यक्रमाला गावाचे सरपंच श्री घोगरे, कृषी सहायक व्ही. पी. रेंगे, मंडळ कृषी अधिकारी एस. एम. माळवे, प्रगतशील शेतकरी बंडू रानमळे, माजी सरपंच विष्णू बीडे, रीवुलीस इंडियाचे व्यवस्थापक शशिकांत राठोड, अजित कुणकीकर, हनुमान पडोळे इत्यादी उपस्थित होते.