Agriculture Department : साहेब, आमचेही पदनाम सहायक कृषी अधिकारी करा

Akola News : राज्यातील ग्रामसेवक व ग्राम विकास अधिकारी ही दोन्ही पदे एकत्रित करून शासनाने ग्रामपंचायत अधिकारी असे नामाभिदान करण्यात आले आहे. अशाच प्रकारे राज्यात कार्यरत असलेल्या कृषी सहायकांचेही पदनाम सहायक कृषी अधिकारी करण्याची जुनी मागणी यानिमित्ताने नव्याने पुढे आली आहे.

राज्य शासनाने २४ सप्टेंबरला ग्रामसेवक व ग्रामविकास अधिकारी या पदासंदर्भात निर्णय घेत ग्रामपंचायत अधिकारी असे नवे नाव दिले आहे. दुसरीकडे गेल्या अनेक वर्षांपासून कृषी सहायकांचे पदनाम सहायक कृषी अधिकारी करण्याची मागणी प्रलंबित आहे. आमचेही पदनाम बदलावे, अशी मागणी राज्यभरातील कृषी सहायकांनी मुख्यमंत्री, उपमुख्यमंत्री व विद्यमान कृषिमंत्र्यांकडे केली आहे.

राज्यभर गाव पातळीवर कृषी विभागाचा आरसा म्हणून कृषी सहायक काम करीत असतात. कृषी विभागाच्या संपूर्ण योजनांच्या अंमलबजावणीची प्रमुख जबाबदारी हा घटक वर्षानुवर्षे पार पाडतो आहे. कृषी सहायकांच्या अनेक मागण्या आजवर आयुक्तालय व शासन स्तरावरून मान्य झाल्या. वर्षानुवर्षे प्रलंबित राहिलेल्या असून, त्यासाठी कृषी सहायक संघटना सातत्याने पाठपुरावा करीत असते.

शासनस्तरावर प्रलंबित असलेल्या मागण्यांमध्ये कृषी सहायकांचे पदनाम सहायक कृषी अधिकारी करण्याची मागणी गेल्या १० ते १२ वर्षांपासून कायम आहे. मध्यंतरी अब्दुल सत्तार हे कृषिमंत्री असताना त्यांनी हे पदनाम बदलाबाबत आश्‍वासनही दिले होते. आमदारांनी या संदर्भात उपस्थित केलेल्या प्रश्‍नावर तेव्हा मंत्र्यांनी आश्‍वासन दिले होते, असे कृषी सहायक सांगत आहेत. मात्र या पदनाम बदलाच्या मागणीवर पुढे शासनस्तरावर काहीही झालेले नाही. आता ग्रामसेवकांचे बदनाम बदलल्याने कृषी सहायकांच्या मागणीला उजाळा मिळाला आहे. विद्यमान सरकारने कृषी सहायकांना सहायक कृषी अधिकारी असे पदनाम द्यावे, या मागणीला राज्यभरात जोर आलेला आहे.

राज्यात सध्या सुमारे साडेअकरा हजारांवर कृषी सहायकांची पदे आहेत. पदनाम बदलल्यामुळे कुठलाही आर्थिक बोजासुद्धा शासनावर पडणार नाही. केवळ नाव बदलणार असल्याचे कृषी सहायक सांगत आहेत. आमच्या मागणीकडे विद्यमान शासनाने तातडीने लक्ष देत बदल करावे, असे कृषी सहायकांचे म्हणणे आहे.